İspaniyanın dövlət yayımçısı RTVE-nin prezidenti Xose Pablo Lopes bəyan edib ki, ölkə İsrail yarışa buraxılacağı təqdirdə “Eurovision 2026”da iştirak etməyəcək.
Musavat.com xəbər verir ki, RTVE rəhbərliyinin qərarına əsasən, əgər İsrail iştirakçı siyahısında qalarsa, İspaniya nə müsabiqədə çıxış edəcək, nə də yarışın yayımını həyata keçirəcək.
Eyni zamanda Madrid müsabiqənin maliyyə dayağını təşkil edən “böyük beşlik” ölkələrindən biri olmasına baxmayaraq, ödəniş payını da ödəmək niyyətində deyil. 2025-ci ildə bu məbləğ təxminən 332 min avro təşkil edib.
Lopes bu açıqlamanı ölkə parlamentində çıxışı zamanı səsləndirib. Onun sözlərinə görə, qərarın əsas səbəbi “Qəzzada törədilən soyqırımı” və İsrailin yarış qaydalarını sistemli şəkildə pozmasıdır.
Məsələ 4–5 dekabr tarixlərində Cenevrədə keçiriləcək Avropa Yayım Birliyinin (EBU) Baş Assambleyasında müzakirə olunacaq əsas gündəm maddələrindən biridir. Toplantıda İsrailin müsabiqədə iştirakının gələcəyi və tele-səsvermə qaydalarının yenilənməsi nəzərdə tutulur.
Bundan əvvəl Niderland, İrlandiya, Sloveniya və İslandiya İsrail iştirak edəcəyi halda “Eurovision 2026”ya qoşulmaq istəmədiklərini açıqlayıblar.
Musavat.com
