Yarmarka Kənd Təsərrüfatı Nazirliyinin tabeliyindəki “Aqrar Tədarük və Təchizat” ASC-nin təşkilatçılığı ilə həyata keçirilir.
Yarmarkanın təşkilində əsas məqsəd yerli fermerlərin məhsullarının bazara çıxışını dəstəkləmək, onları alternativ satış nöqtələri ilə təmin etmək, eyni zamanda şəhər sakinlərinin təbii, yerli və sağlam kənd məhsullarına əlçatanlığını artırmaqdır.
Yarmarkada 30-a yaxın regiondan iştirak edəcək 55-ə yaxın fermer 120-ə qədər çeşiddə kənd təsərrüfatı və qida məhsullarının satışını həyata keçirir.
Burada satışa çıxarılan məhsulların keyfiyyətinə Azərbaycan Qida Təhlükəsizliyi Agentliyi nəzarət edir.
Yarmarkada satılan kənd təsərrüfatı məhsulları digər bazarlara nisəbətən daha ucuzdur. Qiymətlərin ucuz olmasına səbəb isə fermerlərin öz məhsullarını vasitəçilər olmadan birbaşa satışa çıxarmasıdır. Bundan başqa yarmarkda iştirak pulsuz olduğundan bazara çıxarılan məhsulun maya dəyərinin aşağı olmasına gətirib çıxarır.
“Aqrar Tədarük və Təchizat” ASC-nin mətbuat katibi Nilufər Qaçayeva jurnalistlərə müsahibəsində bildirib ki, yarmarkanın keçirilməsində əsas məqsəd bayram günləri ərəfəsində şəhər sakinlərini kənd təsərrüfatı məhsulları ilə təmin etməkdir.
Qeyd edək ki, Yarmarka həftəsonu 9:00-dan 19:00-dək Nərimanov rayonu, Fətəli xan Xoyski küçəsi, 5 (“Gənclik” metro stansiyasının yanı) ünvanında təşkil olunub. “Mövsüm Yarmarkası”-nda fermerlər piştaxta, tərəzi və digər lazımi avadanlıqlarla ödənişsiz şəkildə təmin olunurlar.
