Bakı, 28 noyabr, AZƏRTAC
Noyabrın 28-də Ailə, Qadın və Uşaq Problemləri üzrə Dövlət Komitəsinin və Suraxanı Rayon İcra Hakimiyyətinin birgə təşkilatçılığı ilə “Təhlükəsiz həyatın qurulmasında icma liderlərinin rolu: Suraxanıda yeni sosial yanaşma” mövzusunda tədbir keçirilib.
AZƏRTAC xəbər verir ki, “Gender əsaslı zorakılığa qarşı 16 günlük fəallıq” kampaniyası çərçivəsində təşkil olunan tədbirdə əvvəlcə ailə dəyərləri mövzusunda pantomim səhnəcik təqdim edilib. Həmçinin 25 Noyabr – Qadınlara qarşı Zorakılıqla Beynəlxalq Mübarizə Günü ilə bağlı videoçarx nümayiş olunub.
Sonra Suraxanı Rayon İcra Hakimiyyətinin başçısı Adil Əliyev çıxış edərək, ailə dəyərlərinin möhkəmləndirilməsinin, zorakılığın qarşısının alınmasının və bu sahədə birgə fəaliyyətin vacibliyini diqqətə çatdırıb.
Ailə, Qadın və Uşaq Problemləri üzrə Dövlət Komitəsinin sədr müavini Bahar Muradova zorakılığın müxtəlif təzahürlərindən və onun cəmiyyətə vurduğu mənfi təsirlərdən danışıb. O, zorakılıq anlayışının fiziki, psixoloji, iqtisadi və sosial aspektləri ilə yanaşı, rəqəmsal zorakılıqla mübarizənin də xüsusi aktuallıq qazandığını diqqətə çatdırıb. B.Muradova çıxışında, həmçinin ailədaxili münasibətlər, münaqişələrin qarşısının alınması və sağlam ailə modelinin təbliği istiqamətində Komitənin gördüyü maarifləndirmə işlərinə də toxunub.
Tədbir “Qadın hüquqlarının qorunması – davamlı inkişafın əsas prinsipi” və “Zorakılığa qarşı mübarizədə ictimai həmrəylik və hüquqi dəstək” mövzularında panel sessiyaları ilə davam edib.
Panel sessiyalarda çıxışlardan sonra iştirakçıların sualları cavablandırılıb, mövzu ətrafında geniş müzakirələr aparılıb.
