Yapon zəlzələ mütəxəssisi, memar və inşaat mühəndisi Yoşinori Morivaki çıxış edərək Türkiyənin zəlzələ reallığı ilə bağlı mühüm xəbərdarlıqlar edib.
Milli.Az xəbər verir ki, Morivaki bildirib ki, Türkiyə zəlzələlərdə ölüm sayına görə dünyada 3-cü yerdədir, buna görə də təhlükəsizlik tədbirlərinin və elmi yanaşmanın gücləndirilməsi həyati əhəmiyyət daşıyır. O, Yaponiyada memar və mühəndislərin geologiya, geofizika və seysmologiyanı məcburi şəkildə öyrəndiyini vurğulayaraq, Türkiyədə də bu sahədə daha ciddi hazırlığa ehtiyac olduğunu söyləyib.
Mütəxəssis qeyd edib ki, Yaponiyada dörd, Türkiyədə isə altı seysmik lövhə var və bu, Türkiyədə vəziyyəti daha mürəkkəb edir. O, Türkiyədəki zəlzələləri "domino daşları" ilə müqayisə edərək bir qırılmanın digərini hərəkətə gətirə biləcəyini vurğulayıb.Hər an güclü zəlzələ ola biləcəyi üçün Türkiyənin bu vəziyyətə hazır olmalı olduğunu da bildirib.
Morivaki bölgələr üzrə risklərlə bağlı bunları deyib:
Balıkesirdə böyük zəlzələ gözlənilmir, Bandırma və Bursa riskli zonalardır, Kırklareli Türkiyənin ən rahat bölgəsidir, Qara dəniz bölgəsində risk azdır, Konya və Karaman zəlzələləri istisna olmaqla təhlükəsiz sayılır, böyük zəlzələ ehtimalı aşağıdır.
Morivaki bildirib ki, Türkiyədə təxminən 21 milyon binanın yarısı hələ də təhlükəsizlik yoxlamasından keçməyib. O, bunu ciddi təhlükə kimi dəyərləndirərək, şəhərsalma və tikinti standartlarının gücləndirilməsinin vacibliyini qeyd edib.
Milli.Az
