GlobalInfo portalından əldə olunan məlumata əsasən, ain.az xəbər verir.
Ermənistanın xarici işlər nazirinin müavini Vahan Kostanyan İRNA agentliyinə müsahibəsində “3+3” formatında növbəti görüşün İrəvanda və ya Bakıda keçirilə biləcəyini söyləyib.
Kostanyan görüşlə bağlı hələlik heç bir dəqiqləşmənin olmadığını bildirib. XİN rəsmisi görüşün vaxtı və yeri barədə müzakirələrin aparılmalı olduğunu deyib.
Maraqlıdır ki, bundan əvvəl Rusiyanın xarici işlər naziri Sergey Lavrov Ermənistanın xarici işlər naziri Ararat Mirzoyanla keçirdiyi mətbuat konfransında Cənubi Qafqaz üzrə “3+3” formatında nazirlərin üçüncü görüşünün hazırlandığını və Moskvanın növbəti iki görüşün Bakıda və İrəvanda keçirilməsinin tərəfdarı olduğunu açıqlamışdı.
Globalinfo.az-a danışan politoloq Məhəmməd Əsədullazadə deyib ki, “3+3” formatı regional iqtisadi inteqrasiyanı özündə ehtiva edir:
“Bu, Azərbaycan və Türkiyənin birgə layihəsidir. Görünür, Moskva bunu mənimsəmək istəyir və regionda öz geosiyasi mövqelərini möhkəmləndirmək niyyətindədir. Gürcüstan layihədə iştirak etmir. Düşünürəm ki, regional şərtlər dəyişir və belə bir formata artıq ehtiyac yoxdur. ABŞ Zəngəzur dəhlizi vasitəsilə regiona daxil olub.
Məhəmməd Əsədullazadə
İran və Rusiya Cənubi Qafqaz siyasətində daim təxribatlara əl atır. Hazırda Azərbaycan və Ermənistan arasında intensiv danışıqlar gedir və pozitiv situasiya mövcuddur. Belə bir format həm İrəvanda, həm də Bakıda keçirilə bilər. Ermənistan nümayəndə heyətinin Azərbaycana gəlişində heç bir problem yoxdur. Bu məsələləri Azərbaycan və Ermənistan özləri müəyyən edəcək. Ümumiyyətlə, bu format siyasi deyil, iqtisadi əməkdaşlıq çərçivəsində ixtisaslaşmalıdır”.
Turan Rzayev
Globalinfo.az
Hadisənin gedişatını izləmək üçün ain.az saytında ən son yeniliklərə baxın.
