ABŞ Prezidenti Donald Tramp Venesuela lideri Nikolas Maduroya telefon danışığı zamanı deyib ki, əgər o, könüllü şəkildə istefa verməsə, Vaşinqton güc tətbiq edə bilər.
Publika.az xəbər verir ki, bu barədə Wall Street Journal öz mənbələrinə istinadən məlumat yayıb.
Mənbələrin sözlərinə görə, ötən həftə Tramp Maduraya bildirib ki, “əgər o, öz istəyi ilə vəzifədən getməzsə”, ABŞ Venesuelaya qarşı müxtəlif fəaliyyət variantlarını, o cümlədən güc tətbiqini nəzərdən keçirəcək. Nəşrin iddiasına görə, iki ölkənin liderləri telefon danışığında həmçinin Maduro və onun yaxın ətrafı üçün mümkün amnistiyanı müzakirə ediblər.
Trampın birinci prezidentlik müddətində, 2020-ci ilin martında ABŞ Maduroya və ölkənin digər bir sıra rəsmilərinə narkoterrorizmdə iştirak ittihamları irəli sürmüş və Venesuela prezidentinin “həbsinə və/və ya təqsirli bilinməsinə gətirib çıxaracaq” məlumat üçün 15 milyon dollar mükafat təyin etmişdi. Bu ilin avqust ayının əvvəlində Vaşinqton Maduronun tutulmasına imkan verəcək məlumat üçün mükafat məbləğini 50 milyon dollara qaldırmışdı.
ABŞ Ədliyyə Nazirliyinin versiyasına görə, Venesuela lideri dünyanın ən böyük narkotacirlərindən biridir və guya ABŞ-ın milli təhlükəsizliyinə təhlükə yaradır.
