Laçın rayonunda Bərpa, Tikinti və İdarəetmə Xidmətinin, “Bakı Abadlıq Xidməti” MMC, “HoçazFilm” kinostudiyasının dəstəyi ilə “Lacinema” Kino Mərkəzində “ANİMAFİLM Laçında” festivalı keçirilib.
Laçın rayonunda Bərpa, Tikinti və İdarəetmə Xidmətindən AZƏRTAC-ın bölgə müxbirinə verilən məlumata görə, Azərbaycan Animasiya Assosiasiyası tərəfindən həyata keçirilən “Yeni animasiya məhsulunun hazırlanması və ustad dərsləri” layihəsi çərçivəsində baş tutan festivalda Xalq şairi Vaqif Səmədoğlunun uşaqlar üçün yazdığı eyniadlı poemasının motivləri əsasında çəkilmiş “Bum-bum” qısametrajlı animasiya filminin təqdimatı və animasiya filminin ərsəyə gəlməsində keçilən yollar haqqında ustad dərsləri təşkil olunub.
Tədbirdə 200 nəfərdən çox tamaşaçı, o cümlədən 2 nömrəli Laçın şəhər, şəhid Ədalət Məmmədov adına Zabux və Sus kənd tam orta ümumtəhsil məktəblərinin şagirdləri iştirak ediblər. Tamaşaçılar əvvəlcə “8-ci ANİMAFİLM Festivalının treyleri”, “Həmişəyaşıl”, “Hədis”, “Tarix”, “Pulun dili”, “Soyuz Qraviton”, “Yer və Ay”, “Narqız”, “Siçan və Pişik”, “Yulaf dönərgə” və “Bum-bum” animasiya filmlərini izləyiblər.
Müzakirədə “HoçazFilm”kinostudiyasının direktoru Amil Məmibəyli, Assosiasiyanın üzvləri - rejissor Elçin Hami Axundov, sseanri müəllifi Gülşən Hüseynova və səs aktyoru Sərxan Nəciyev iştirak ediblər. Müzakirədən sonra Rəşid Ağamalıyev “İsi və Piti” animasiya serialının yaradılmasına dair ustad dərsi keçib.
