44 gün ərzində oğullarımız həqiqətən də böyük və unudulmaz bir tarix yazdılar. Bu tarix Azərbaycanın qüruru, xalqımızın birliyinin və igidliyinin rəmzidir. Həmin şanlı tarixi yazan qəhrəmanlardan biri də vətənimiz üçün canını fəda edən şəhid Faiq Mehdi oğlu Adgözəlovdur.
Faiq Adıgözəlov sentyabrın 1-i 1996-cı ildə Yevlax rayonunun Nemətabad kəndində dünyaya göz açıb. 2014-2016-cı illərdə həqiqi hərbi xidmətini N saylı hərbi hissədə başa vurub. Hərbiyə olan sevgisi 2017-ci ildə onu yenidən müddətdən artıq hərbi xidmət qulluqçusu kimi orduya qaytarır və o, layiqincə xidmət etməyə başlıyır. Faiq bir neçə dəfə keçirilən ordu oyunlarının iştirakçısı olub, beynəlxalq ordu yarışlarında isə ölkəmizi layiqincə təmsil edib.
Faiqgil ailədə üç qardaş olub.
Hər üçü də Vətənə xidmət edərək 44 günlük Qarabağ müharibəsində qəhrəmancasına döyüşüblər. Onlar İkinci Qarabağ müharibəsində ailə olaraq igidlik, mərdlik və vətənə sədaqət nümunəsi göstəriblər. Eyni zamanda ailənin böyüyü, şəhidimizin atası Mehdi kişi də Birinci Qarabağ müharibəsində qəhrəmancasına döyüşlərdə iştirak edib.
Bizim.Media-ya danışan şəhidin atası Mehdi kişinin sözlərinə görə, onun oğlu ilə son danışığı oktyabrın 8-də olub və müharibə qurtaran kimi şəhid yoldaşlarının ailəsini ziyarət edəcəyini bildirib:
“Faiqlə son danışığımız oktyabrın 8-də olmuşdu. Mənim Şamaxıdan bir qazi dostum var idi, onun oğlu Faiqin qucağında şəhid olmuşdu. Faiq bu hadisədən təsirlənərək mənə zəng etdi və "Ata, gəlim mütləq ora gedək. Müharibə bitsin, ilk işimiz şəhid qardaşımızın ailəsini ziyarət etmək olacaq” dedi.
Bundan sonra dəfələrlə zəng etsəm də, Faiqə zəng çatmadı. Oktyabr ayının 10-da xəbər verdilər ki, müvəqqəti atəşkəs elan olunub. Mən də çox sevindim. Təxminən yarım saat keçmişdi ki, Faiqin telefonundan mənə zəng gəldi…”
Ata bilsəydi ki, o zəngdə dəhşətli bir xəbər eşidəcək, bəlkə də heç vaxt o zəngi açmazdı.
"Oğlumun üzündə böyük bir xal var idi. Ona görə biz ona həmişə “Xallı” deyirdik. Telefonu açan kimi “Hə, atam, Xallı, necəsən?”-dedim. Onda ortancıl oğlum Müşviq " Ata, Xallı deyil, mənəm tez özünü xəstəxanadakı morqa çatdır", - söylədi. O gündən bütün arzularım, ümidlərim, sevgilərim, gülüşlərim Faiqimlə sönüb getdi”.
Ürəyində böyük acı yaşayan Mehdi ata oğlu ilə qürur duyduğunu da dilə gətirib:
“Bu gün qələbəmizə sevinməyə bilmərəm. Düzdür, hər bir valideyn üçün, övlad itkisi olduqca ağırdır. İnanın, mən o qədər sevinirəm ki, oğlum Faiq bu gün xalqımızın ZƏFƏR tarixini yazan müəlliflərindən biridir. Mən belə düşünürəm ki, əgər mən bu gün oğlum üçün ağlasam, onun ruhu narahat olar. Axı o xalqımızın zəfərini yazanlardan biridir?!”
Şəhidimizin ən böyük xobbisi idmanla məşğul olmaq olub və buna görə də o ən ağır döyüşlərdə iştirak edib.
Qəhrəmanımızın anası da oğlundan söhbət açdıqca göz yaşlarına hakim ola bilmirdi. Ən çox da Faiqin son sözlərini xatırladıqca özünə yer tapa bilməyən Sevil Adgözəlova Bizim.Media-ya bu sözləri danışdı:
"O gün sanki zaman daha yavaş axırdı. İçimdə qəribə bir narahatlıq var idi. Mən sonuncu dəfə telefon danışığında onun üçün çox darıxdığımı söylədim, onu görmək, yanında olmaq, bərk -bərk qucaqlamaq istədiyimi dedim. O, isə sakitcə cavab verdi: “Narahat olma, ana, iki gündən sonra icazə alıb gələcəm” .
İki gün keçdi… və o özü gəlmədi. Səhər açılınca, qapımıza tabutu gəldi. Faiqin yoxluğu hər gün hiss olunur. Mən demək olar ki, hər gün onunla şəkillərinə baxaraq danışıram və “səni heç vaxt unutmaram oğul” deyirəm".
Faiq Adıgözəlov Vətən müharibəsi dövründə Gülüstan, Ağuçuq, Talış-Suqovuşan istiqamətində gedən hərbi əməliyyatlarda iştirak edib. 29 sentyabr 2020-ci il tarixində Ağuçuq istiqamətində qarşı tərəfin əlaqə yolunu kəsərək hücum edən düşmən tankının irəliləməsinə əngəl olub. Suqovuşan istiqamətində düşmənin hücuma keçən PDM-2 zirehli texnikasını sıradan çıxarıb. Faiq 2020-ci il oktyabrın 10-da düşmən mövqeyinə hücum zamanı qəhrəmancasına şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Prezident İlham Əliyevin Sərəncamına əsasən Faiq Adıgözəlov ölümündən sonra “Vətən uğrunda”, “Suqovuşanın azad olunmasına görə” və “İgidliyə görə” medalları ilə təltif edilib.
Onu da qeyd edək ki, şəhidimiz subay olub.
Leyla Vəfadar, Bizim.Media, Mərkəzi-Aran bürosu
- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
