Elm və Təhsil Nazirliyinin dəstəyi və “Alqoritmika” beynəlxalq proqramlaşdırma və riyaziyyat məktəbinin təşkilatçılığı ilə keçirilən Məktəblilərarası Milli Hakaton – 2025 müsabiqəsinin mükafatlandırma mərasimi baş tutub.
Ucnoqta.az xəbər verir ki, Qəbələ şəhər Şirvan Bulqədirov adına 5 nömrəli tam orta ümumtəhsil məktəbinin IX sinif şagirdi Tunar Hacızadə müsabiqədə 2-ci yerin qalibi olub.
Müsabiqəyə ölkənin 63 regionundan 350 mindən çox məktəbli qatılıb. Onlardan 300 məktəbli final mərhələsində iştirak edib. Final mərhələsində komandalar turizm, ekologiya, maliyyə, mədəniyyət və incəsənət sahələri üzrə hazırladıqları veb-sayt, mobil tətbiq və oyun formatlı layihələrlə çıxış ediblər.
Məktəblilərarası Milli Hakaton – 2025-in əsas məqsədi məktəblilər arasında proqramlaşdırma və rəqəmsal bacarıqların inkişafına dəstək olmaq, yaradıcı və istedadlı şagirdləri üzə çıxarmaq, eləcə də onların gələcək inkişaf imkanlarını genişləndirməkdir.
Qeyd edək ki, Şəki-Zaqatala Regional Təhsil İdarəsi müsabiqədə 2 yarımfinalçı ilə təmsil olunub. Onlardan biri finala yüksələrək komanda ilə birlikdə 2-ci yerə layiq görülüb.
