Ümumdünya Səhiyyə Təşkilatı (ÜST) piylənmənin xroniki və təkrarlanan xəstəlik kimi müalicəsində GLP-1 terapiyalarının istifadəsinə dair ilk təlimatını dərc edib.
QHT.az xəbər verir ki, təşkilat bildirir ki, hazırda dünyada 1 milyarddan çox insan piylənmədən əziyyət çəkir və 2024-cü ildə bu xəstəliklə bağlı 3,7 milyon ölüm qeydə alınıb. Yeni təlimata əsasən, liraqlutid, semaqlutid və tirzepatid kimi GLP-1 dərmanları hamilə qadınlar istisna olmaqla, böyüklərdə uzunmüddətli müalicə üçün şərti olaraq tövsiyə edilir. ÜST həmçinin dərmanların strukturlaşdırılmış davranış müdaxilələri — sağlam qidalanma və fiziki aktivliklə birlikdə tətbiq edilməsinin daha yaxşı nəticə verdiyini vurğulayır.
Təşkilat xəbərdarlıq edir ki, təkcə dərmanlar qlobal piylənmə böhranını həll etməyəcək və dövlətlərin sağlam mühit yaratmaq, erkən skrininq aparmaq və ömürlük qayğı təmin etmək üçün hərtərəfli strategiyalar qurması vacibdir. GLP-1 preparatlarına artan tələbat saxta və keyfiyyətsiz məhsulların yayılmasına səbəb olduğundan, ÜST ölkələri nəzarəti gücləndirməyə çağırır. Proqnozlara görə, istehsal artımına baxmayaraq, 2030-cu ilə qədər bu müalicələrdən ehtiyacı olanların cəmi 10 faizdən azı faydalana biləcək. Təşkilat daha ədalətli çıxış üçün birləşdirilmiş satınalma və qiymətlərin optimallaşdırılması kimi mexanizmlərin tətbiqini təklif edir.
R.İmanov
