Gəncə Apellyasiya Məhkəməsində dələduzluqda təqsirləndirilən İsa Səfərovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Sevindik Əzizovun sədrliyi ilə keçirilən prosesdə qərar elan olunub.
Qərara əsasən, apellyasiya şikayəti təmin edilməyib.
İttihama görə, İsa Səfərov Qazax rayonunda fəaliyyət göstərən şirkətlərdən birinin satış nöqtəsinin əməkdaşı olub. O, şirkətə məxsus mal-materialları mənimsədiyinə görə dələduzluqda təqsirli bilinib. İş materiallarına görə, təqsirləndirilən şəxs 2021-ci ildə əmək müqaviləsi əsasında satış nöqtəsinin satıcı-anbardarı vəzifəsinə təyin olunub və tam maddi məsul şəxs qismində ona məhsulların qəbulu, saxlanılması, təhvil verilməsi və satışdan əldə edilən vəsaitin qorunması səlahiyyəti həvalə olunub.
Araşdırmalar göstərib ki, İsa bu səlahiyyətlərindən sui-istifadə edərək, Qazax rayon satış nöqtəsinə müxtəlif adda kənd təsərrüfatı gübrələrinin sifarişini verib, məhsulları isə ASC-yə məxsus sürücülərdən Tovuz və Qazax rayonlarında qəbul edib. Həmin məhsullar bir neçə təhvil-təslim aktı əsasında şirkətin balansına daxil edildikdən sonra, onların satış nöqtəsinə məxsus olması barədə sənədləşmə aparılmayıb və satışdan əldə olunan vəsaitin şirkətə qaytarılması təmin edilməyib.
İş materiallarında qeyd olunur ki, təqsirləndirilən şəxs ümumilikdə 182,079,12 kq və əlavə 2 kisə kənd təsərrüfatı məhsullarını qəbul edib. Bu məhsulların bir hissəsi – 9,732 kq satılaraq əldə edilən pul şirkət hesabına ödənilsə də, 104 074 manat dəyərində olan 172 347,12 kq və əlavə 2 kisə məhsulun satışından əldə olunmuş vəsait mənimsənilərək şəxsi məqsədlərə sərf olunub.
İttihama görə, təqsirləndirilən şəxs şəffaf maliyyə hərəkətləri aparılmasını təmin etməyib, məhsulların satışını qanunsuz şəkildə həyata keçirib və əldə olunan pulu şirkətə qaytarmayıb. Nəticədə, Cəmiyyətə məxsus ümumilikdə 104,074 manat məbləğində maliyyə vəsaiti ələ keçirilib və şirkətə külli miqdarda ziyan vurulub.
Gəncə Ağır Cinayətlər Məhkəməsinin hökmü ilə İsa Səfərov 7 il müddətinə azadlıqdan məhrum edilib.
Kamal Məmmədov
