Şuşa, 5 dekabr, Tahir Ağaməmmədov, AZƏRTAC
İşğaldan azad edilmiş ərazilərdə sağlam ətraf mühitin yaradılması, bioloji müxtəlifliyin qorunması və artırılması, yeni yaşıllıq massivlərinin salınması, xüsusi mühafizə olunan təbiət ərazilərinin fəaliyyətinin bərpası, o cümlədən yeni xüsusi mühafizə olunan təbiət ərazilərinin yaradılması, mineral xammal ehtiyatlarının qiymətləndirilməsi və axtarışı, hidrometeoroloji müşahidə şəbəkəsinin yaradılması, fauna növlərinin ərazilərə reintroduksiyası, həmçinin Qarabağ və Şərqi Zəngəzur iqtisadi rayonlarında əkin materialına olan tələbatın ödənilməsi və meşəçi mütəxəssislərin yetişdirilməsi məqsədilə “Azərbaycan‒Türkiyə Beynəlxalq Meşəçilik Təlim Mərkəzi”nin və “Ağıllı Tinglik Təsərrüfatı”nın yaradılması ilə bağlı işlər davam etdirilir.
AZƏRTAC-ın bölgə müxbiri xəbər verir ki, bunu Şuşa şəhərində keçirilən Ekoloji məsələlər üzrə İşçi qrupun iclasında ekologiya və təbii sərvətlər nazirinin müavini, İşçi qrupun rəhbəri Vüqar Kərimov deyib.
Vüqar Kərimov bildirib ki, bu xüsusda işğaldan azad edilmiş rayonların ərazi planlaşdırma sənədlərinə uyğun olaraq, yaşıllıq sahələrinin yaradılması məqsədilə ayrılmış Zəngilan, Cəbrayıl, Ağdam, Füzuli rayonlarının ərazisində ümumilikdə 132 hektar yeni yaşıllıq sahəsi salınıb. Eyni zamanda, meşə fondu ərazilərinin minalardan və partlamamış hərbi sursatlardan təmizlənməsi planları çərçivəsində Cəbrayıl, Zəngilan, Qubadlı, Füzuli və Laçın rayonları ərazisində ümumilikdə 408 hektar meşə fondu sahələrində əkin və səpin işləri icra olunub.
Həmçinin Ağdərə, Laçın, Zəngilan və Cəbrayıl rayonlarının ümumilikdə 240 hektar meşə fondu sahələrində meşəbərpa tədbirlərinə başlanılıb və hazırda meşə əkini və səpini işləri davam etdirilir.
