“Yağışlı havalarda paytaxt yolları əməkdaşlarımız tərəfindən həm müşahidə kameraları vasitəsilə həm də yerində baxış keçirtməklə daima nəzarətdə saxlanılır. Təbii ki, işıqforların işində obyektiv və subyektiv səbəblərdən problemlər yarana bilir”.
Bu sözləri Pravda.az-a DİN-in Nəqliyyatı İntellektual İdarəetmə Mərkəzinin Mətbuat katibi Ömər Xıdırov bildirib.
Onun sözlərinə görə, müşahidələr göstərir ki, problemlər daha çox ərazidə elektrik enerjisinin kəsilməsi səbəbindən yaranır: “Kameralarla biz həmin ərazilərə baxırıq. Problem yarandığı təqdirdə əməkdaşlar əraziyə baxış keçirirlər və aidiyyatı quruma da məlumat verilir. Bu müddət ərzində də problem həll edilir. Hazırda bu vaxtadək yaranmış problemlər həll edilib, vəziyyət də nəzarət altındadır”.
Mətbuat katibi onu da əlavə edib ki, yağışlı hava, nəqliyyat sıxlığının yaranmasına təsir göstərdiyindən sürücülər ehtiyyatlı olmalıdırlar: “Bəzən texniki nasaz avtomobillərin yolda qalması, bəzən maddi zərərlə nəticələnən qəzaların baş verməsi də bu sıxlığın müddətinin artmasına səbəb ola bilir. İstənilən halda sürücülərə dəfələrlə müraciət etmişik. Həm Dövlət Yol Polisi, həm də Nəqliyyat İntellektual İdarəetmə Mərkəzi tərəfindən müraciət edilib ki, yollarda bəzi qaydalara əməl edilməlidir. Məsələn, təkərlərin, şüşəsilənlərin, işıq cihazlarının vəziyyətinə baxılmalıdır. Yaranan texniki nasazlıq varsa, dərhal həll etməlidirlər. Hərəkət zamanı ara məsafəsi gözləniləndən daha çox saxlanılmalıdır ki, yağış səbəbindən sürüşkən vəziyyət yarana bilər, bu da qəzaların baş verməsinə gətirib çıxara bilər. Bununla yanaşı sürət həddinə diqqət edilməlidir. Piyadalara qarşı həssas yanaşmalıdırlar. Piyada keçidini bildirən nişan yaxınlığında sürət həddi endirilməlidir, piyadalara yol verilməlidir. Yolun hərəkət hissəsində su olan zaman piyadanı gördükdə sürəti azaldıb onun rahat hərəkətini təmin etməlidirlər. Elə sürücülər var ki, sürəti daha da artırırlar və suyu piyadaların üzərinə sıçradırlar. Ümumilikdə bu məsələyə diqqətlə yanaşmalıdırlar”.
Qeyd edək ki, gecədən başlayan yağış Bakıda bir sıra küçə və prospektdə işıqforların işində problem yaradıb.
Şəhanə Quliyeva
