2024-cü ilin dekabrın 25-də Bakı–Qroznı reysini yerinə yetirən “Azərbaycan Hava Yolları” Qapalı Səhmdar Cəmiyyətinə məxsus “Embraer 190” təyyarəsinin Qazaxıstan Respublikasının Aktau şəhəri yaxınlığında qəzaya uğraması hadisəsinin bir ilinin tamam olmasına az zaman qalıb.
Xatırladaq ki, qəza nəticəsində iki uçuş heyəti üzvü (kapitan və ikinci pilot), böyük təyyarə bələdçisi və 35 sərnişin həlak olub. Qazaxıstan hakimiyyətinin bu ilin sonuna qədər Azərbaycan Hava Yollarına (AZAL) məxsus təyyarənin qəzaya uğramasına dair aparılan araşdırmanın nəticələrini təqdim edəcəyi gözlənilir. Bu barədə Qazaxıstanın baş nazirinin müavini Kanat Bozumbayev bildirib. Bir neçə ay öncə isə Rusiya Prezidenti Vladimir Putinin, Prezident İlham Əliyevlə Düşənbədə keçirilən görüşünün əsas gündəm məsələlərindən biri “AZAL” təyyarə qəzası olub. Rusiya Prezidenti Vladimir Putin, hadisənin obyektiv araşdırılması və qəzanın bütün səbəblərinin müəyyən edilməsi üçün lazım olan bütün imkanların təmin olunacağını, qəzanın səbəblərinə və bu işdə məsuliyyət daşıyan şəxslərin fəaliyyətinə hüquqi qiymət veriləcəyini bildirib.
Mövzu ilə bağlı Pravda.az-a açıqlama verən Milli Məclisin deputatı Elman Məmmədovun sözlərinə görə, Rusiya tərəfinin müəyyən qədər sığorta ödənişi ödəməsi və ya danışıqlarda üzrxahlıq etməsi əsas deyil:
“Dövlətlərarası münasibətlərdə bu məsələlərlə bağlı beynəlxalq konvensiyalar var. Təzminat da, ödəniş də beynəlxaq konvensiyalar, qayda-qanunlar müstəvisində həll edilməlidir. Təzminat, digər məsələlər beynəlxalq səviyyədə sənədlərə əsaslanmalıdır. Rusiya bundan qaçmamalıdır. Çünki Vladimir Putin rəsmi şəxsdir, o həm öz şəxsiyyətinə, həm də öz tutduğu vəzifənin məsuliyyətinə əsaslanıb hərəkət etməlidir. Sözdən qaçmaq və ya beynəlxalq münasibətlərə xələl gətirən hərəkətlər etmək mənə elə gəlir ki, Rusiya tərəfinə və onun rəhbərinə yaraşmaz”.
E.Məmmədov qeyd edib ki, araşdırma nəticələrinin verilməsinə sayılı günlər qalıb: “Bir ilin tamamlanma müddətinə az qalıb. Qısa müddət ərzində artıq istintaqın nəticəsi elan olunmalıdır. Görək nələr deyiləcək. Qərarı gözləməliyik”.
Şəhanə Quliyeva
