Tarix xalqların silinməz yaddaşıdır və bu yaddaşın kökünü kəsməyə yönələn cəhdlər hər zaman məğlubiyyətə məhkumdur!
Bu gün biz, Qərbi Azərbaycana qayıdışın təkcə bir arzu deyil, milli iradənin gücü ilə reallaşacaq böyük bir tarixi hədəf olduğunu bütün varlığımızla dərk edirik! İllər öncə zorla öz yurdlarından qovulan azərbaycanlıların yeni nəsli, o müqəddəs torpaqların tarixi gerçəkliyini yaşatmaq və oraya qayıtmaq əzmi ilə yetişir. Bu fəxr hissi bizi yalnız istək və duyğularla deyil, bilik, elm, strategiya və sarsılmaz milli ruh ilə hərəkətə gətirir.
Qəlbində daim doğma torpaqların həsrətini yaşadan, Ulu Öndər Heydər Əliyevin özü də tarixi ədalətin bərpasına böyük önəm verirdi. Onun dediyi kimi: "Ermənistandan azərbaycanlıların kütləvi surətdə deportasiya edilməsi, tarixi abidələrin dağıdılması, toponimlərin dəyişdirilməsi Azərbaycan xalqına qarşı törədilmiş ən böyük cinayətlərdən biridir." Bu sözlər tarixi həqiqətləri inkar etməyə çalışanlara ən sərt cavabdır.
Qərbi Azərbaycan yalnız xəritələrdəki bir ərazi deyil, o, xalqımızın qəlbində döyünən, ruhumuzda yaşayan əbədi məkandır! O torpaqlar bizim dədə-baba yurdlarımızdır, kimliyimizin ayrılmaz hissəsidir. Zaman keçdikcə həmin ərazilərin tarixi və mədəni irsi məqsədyönlü şəkildə silinməyə çalışılsa da, bu həqiqətləri unutdurmaq qeyri-mümkündür! Çünki orada məhv edilmiş hər abidə, dəyişdirilmiş hər toponim, əslində, o torpaqların bizə aid olduğunu bir daha uca səslə təsdiqləyir! Bizim vəzifəmiz sadəcə xatırlamaq deyil, bu tarixi həqiqətləri bütün gücümüzlə daha da gücləndirmək, onların unudulmasına qətiyyən imkan verməməkdir! Bu baxımdan, elm, mədəniyyət və diplomatiya sahəsində çalışan hər bir azərbaycanlı, bu beynəlxalq ədalət mübarizəsinə öz peşəkar töhfəsini verməlidir.
Bu gün biz tariximizi qorumaqla yanaşı, onu yeni nəslə ötürməliyik. Qərbi Azərbaycanın tarixi ilə bağlı sistemli maarifləndirmə aparmaq, beynəlxalq ictimaiyyətə həqiqətləri çatdırmaq və bu istiqamətdə müxtəlif təşəbbüslərdə iştirak etmək hər birimizin müqəddəs borcudur. Bu qayıdışın gerçəkləşməsinin əsas təminatçısı olan Cənab Prezident İlham Əliyev isə siyasi iradənin gücünü belə bəyan edir: "İndiki Ermənistan ərazisindən qovulmuş azərbaycanlıların öz dədə-baba yurdlarına qayıtması məsələsi beynəlxalq hüquq müstəvisində həll edilməlidir və bu, bizim daimi gündəliyimizdədir."



Bunun üçün biz müasir kommunikasiya vasitələrindən geniş istifadə etməli, sosial media platformalarında, beynəlxalq tədbirlərdə və akademik müzakirələrdə qətiyyətli, arqumentli sözümüzü deməliyik. Xaricdə təhsil alan və ya fəaliyyət göstərən azərbaycanlılar, öz intellektual potensialları ilə bu prosesdə xüsusi rol oynayaraq, həqiqətləri dünya auditoriyasına çatdırmalıdırlar. Diaspora fəaliyyəti bir cəbhəyə çevrilməli, beynəlxalq təşkilatlarda aktiv rol alaraq, tarixi ədalətin bərpası uğrunda mübarizə aparılmalıdır.
Mədəniyyətimizi yaşatmaq və dünyaya tanıtmaq – qayıdışın mənəvi təməlini təşkil edir. Qərbi Azərbaycanın muğamı, folkloru, mətbəxi və adət-ənənələri bizim milli varlığımızın canlı şahididir. Bu dəyərləri gələcək nəsillərə ötürmək, onları qoruyub inkişaf etdirmək üçün fundamental mədəni layihələr həyata keçirilməlidir. Kitabların yazılması, sənədli filmlərin çəkilməsi, elmi konfransların, sərgilərin və tədbirlərin təşkili bu istiqamətdə atıla biləcək ən önəmli addımlardandır. Bu layihələr təkcə Azərbaycan daxilində deyil, beynəlxalq səviyyədə də həyata keçirilməlidir ki, dünya ictimaiyyəti mədəni soyqırımın qarşısında duran bu qədim mədəniyyəti öyrənə bilsin.
Qayıdış təkcə fiziki deyil, həm də mənəvi, intellektual və siyasi hazırlıq tələb edir. Tarix bizə öyrədir ki, xalqın birliyi onun ən böyük, yenilməz gücüdür. Bu gün biz nə qədər həmrəy və qətiyyətli olsaq, sabah o torpaqlara bir o qədər əminliklə qayıda bilərik. Çünki vətənə qayıdış yalnız istək deyil, həm də milli iradənin gücü ilə reallaşacaq danılmaz bir gerçəklikdir! Tarixi ədalətin bərpa olunması təkcə dövlət siyasəti deyil, xalqın öz köklərinə bağlılığı və haqq yola olan sarsılmaz inamının nəticəsidir. Bu inamı qoruyaraq, gələcək nəsillərə ötürmək bizim əlimizdədir. Biz, bir Azərbaycanlı olaraq, öz torpaqlarımıza sahib çıxmalı və onları yalnız xəyalımızda deyil, real həyatda, quruculuqda və inkişafda yaşatmalıyıq!

• Mədəniyyət
• Vətən
• Zəfər
• Qayıdış