Tayland Silahlı Qüvvələrinin məlumatına görə, Kamboca qoşunları ilə sərhəddə baş verən toqquşmalar zamanı yaralanan Tayland hərbçilərinin sayı 8-dən 29-a yüksəlib.
"Operativ Məlumat Mərkəzi-OMM" xəbər verir ki, bu barədə ordu sözçüsü Surasan Xonqsiri brifinqdə bildirib.
Onun sözlərinə görə, döyüşlər nəticəsində bir Tayland əsgəri həlak olub, 29 nəfər yaralanıb.
Gərginlik dekabrın 8-də Kamboca qüvvələrinin yerli vaxtla səhər saat 5:00-da Tayland mövqelərini atəşə tutması ilə başlayıb. Cavab olaraq Tayland Hərbi Hava Qüvvələri Kambocanın hərbi infrastrukturuna zərbələr endirib. Tayland Ordusunun İkinci Hərbi Bölgəsi həmçinin Kambocanın BM-21 sistemləri və intiharçı dronlardan istifadə edərək bazar ertəsi və çərşənbə axşamı Tayland ərazisini atəşə tutduğunu bildirib.
Tayland qüvvələri əsas strateji ərazilərə nəzarəti təmin etmək və düşmən mövqelərinə zərər vurmaq məqsədilə cavab atəşləri açıb.
