Moskva, 9 dekabr, AZƏRTAC
Rusiya Prezidenti Vladimir Putin Sovet İttifaqını bərpa etməyə çalışmır, çünki bu, geosiyasi cəhətdən mümkün deyil.
AZƏRTAC xəbər verir ki, bu barədə Rusiya liderinin mətbuat katibi Dmitri Peskov NATO ölkələrinin hərbiləşdirilməsini Rusiya Prezidentinin guya SSRİ-ni dirçəltmək niyyəti ilə əlaqələndirən Almaniya kansleri Fridrix Mertsin açıqlamalarını şərh edərək bildirib.
Peskov qeyd edib ki, bu cür iddialar həqiqətə uyğun deyil və Vladimir Putin Sovet İttifaqının bərpasının mümkün olmadığını dəfələrlə bildirib. Mətbuat katibinin sözlərinə görə, bu cür açıqlamalar Rusiyanın MDB və inteqrasiya birliklərindəki tərəfdaşlarına və müttəfiqlərinə qarşı hörmətsizlik nümayiş etdirir.
Kreml sözçüsü, həmçinin Mertsin Rusiyanın NATO-ya hücum hazırladığı tezislərini təkzib edərək, bu cür ittihamların əsassız olduğunu vurğulayıb.
Fəridə Abdullayeva
AZƏRTAC-ın xüsusi müxbiri
Moskva
