ABŞ Senatının Xarici Əlaqələr Komitəsi, Bəşar Əsəd rejiminin devrilməsinin birinci ildönümünə dair yaydığı bəyanatda, Suriyanın Əhməd Şəraa administrasiyasını ölkəni Rusiya və İranın təsirindən azad etməyə çağırıb.
Vətəninfo.az xəbər verir ki, Komitənin sədri Cim Riş və yüksək rütbəli üzvü Cin Şahin tərəfindən səsləndirilən bəyanatda qeyd olunur ki, Suriya xalqı yarım əsrdən çox davam edən avtoritar və repressiv idarəçiliyə son qoyub. ABŞ Senatının bəyanatına görə, Əsədin repressiyalarına qarşı Suriya xalqının gücü və dözümlülüyü, ABŞ-nin sanksiyaları, Rusiyanın Əsədi dəstəkləmək imkanlarının zəifləməsi və İsrailin İranın proksi qüvvələrinə qarşı müqaviməti ilə birlikdə rejimin dağılmasına və Suriya xalqı üçün daha yaxşı gələcək üçün zəmin yaradıb.
Xarici Əlaqələr Komitəsi əlavə edib ki, Suriyanın yeni hökuməti terrorizmə qarşı ortaq tələblərə ciddi sadiqlik nümayiş etdirib və onilliklər ərzində ilk dəfə olaraq İsraillə birbaşa dialoqa başlayıb, bu isə bir il əvvəl təsəvvür edilə bilməzdi.
Bəyanatda həmçinin vurğulanıb ki, Suriya hökumətini ölkəni Rusiya və İranın təsirindən azad etməyə, narkotik anbarları və kimyəvi silahları məhv etməyə və itkin düşmüş amerikalıların tapılması üçün əməkdaşlıq etməyə çağırır.
