Bakı, 11 dekabr, Günel Alıyeva, AZƏRTAC
Uşaqların Üzeyir Hacıbəyli ilə teatr vasitəsilə tanış olması onların mənəvi inkişafı üçün zərurətdir. Bu, təkcə zərurət deyil, həm də uşağın mənəvi inkişafı üçün lazımdır. Söhbət yalnız dahi bəstəkarın 140 illik yubileyini qeyd etməyimizdən getmir. “Günay” teatrında biz artıq təxminən 15 ildir “Arşın mal alan” tamaşasını səhnələşdiririk. Mən bu əsəri çox sevirəm və bizdə gözəl bir ənənə formalaşıb ki, tamaşada iştirak nəsildən-nəslə ötürülür.
Bunu AZƏRTAC-a açıqlamasında “Günay” uşaq teatrının bədii rəhbəri və baş rejissoru Larisa Tarusova bildirib.
Onun sözlərinə görə, uşaqlar böyüyür, müxtəlif peşələr seçirlər, lakin milli musiqiyə sevgi onların həyatında hər zaman qalır.
“Üzeyir Hacıbəylinin musiqisi möhtəşəmdir, özünün yazdığı mətnlər, libretto isə əsl incidir. Onlar parlayır, səslənir, yaşayır. Mənim üçün Üzeyir Hacıbəyli hər şeyimizdir”, – deyə L.Tarusova vurğulayıb.
O qeyd edib ki, səhnəyə çıxaraq bu obrazları yaşamaq, bu musiqini ifa etmək, bu mətnləri qavramaq uşaqlarda həmin dövrün mədəniyyətini, XIX əsrin ab-havasını daha dərindən anlamağa imkan yaradır.
“Burada canlı, fasiləsiz bir xətt yaranır: keçmişdən bu günə və oradan da gələcəyə. İnanıram ki, onlar böyüdükdə bu barədə öz övladlarına danışacaq, onları da bu ölməz tamaşaya gətirəcəklər. Məncə, bu əsər həmişə yaşayacaq”, – deyə müsahibimiz əlavə edib.
Üzeyir Hacıbəylinin əsərlərində əks olunan və xüsusilə müasir uşaq üçün dəyər kəsb edən ideyalardan danışan Larisa Tarusova bildirib ki, bu əsərlərin məzmunu həqiqətən möhtəşəmdir. Hər şeydən əvvəl zəngin musiqi palitrası heyrətə gətirir, lakin məsələ təkcə musiqidə deyil. Bu əsərlərdə incə yumor, insana hörmət, ailə münasibətləri modelləri, sevgi, həyat yoldaşı seçimi, kişi və qadın arasında qarşılıqlı hörmət kimi məsələlər parlaq şəkildə təqdim olunur.
“Həmin dövrlərdə belə vurğulanırdı ki, sevgi hissi qəlbdən gəlməli, səmimi, dərin olmalı və mümkün qədər ömürlük davam etməlidir. Bu, müasir uşaqlar üçün çox mühüm mesajdır. Onlar anlamalıdırlar ki, əsl hisslər dəyişmir, sevgi isə məsuliyyət və sədaqətdir”, – deyə bədii rəhbər bildirib.
Müsahibimizin sözlərinə görə, Üzeyir Hacıbəyli bu ideyaları həm musiqidə, həm də librettoda ustalıqla ifadə edib. Məhz buna görə onun əsərləri bu gün uşaqlar üçün son dərəcə vacibdir, belə ki, onlar zövq formalaşdırır, dəyərlər sistemini möhkəmləndirir və mənəvi cəhətdən zəngin, həssas və düşünən bir insan yetişməyə kömək edir.
