Rusiyanın Pokrovsk şəhərini ələ keçirməsi ehtimal deyil, daha çox zaman məsələsi kimi görünür. Donetsk vilayətinin şimalında yerləşən və müharibədən əvvəl təxminən 60 min nəfərin yaşadığı şəhər ciddi dağıntılara məruz qalıb, hazırda orada cəmi təqribən 1200 sakin qalıb.
NOCOMMENT.az xəbər verir ki, bu barədə Reuters yazıb.
Ukrayna mövqelərini müdafiə etməyə davam edir və dronlar ilə fortifikasiya qurğuları hesabına müdafiəni gücləndirir. Bununla belə, Rusiya hücum qrupları yaranan boşluqlardan istifadə edərək kiçik qüvvələrlə irəliləyirlər. Ekspertlər hesab edir ki, Pokrovskun düşməsi Ukraynanın müdafiəsinin çökməsinə səbəb olmayacaq, lakin ABŞ ilə mümkün sülh danışıqlarında Kiyevin mövqelərini zəiflədə bilər.
Nəşrin qeyd etdiyinə görə, Ukrayna ABŞ ilə konstruktiv münasibətləri qorumağa məcburdur, çünki Vaşinqton həyati əhəmiyyətli kəşfiyyat məlumatları və silah tədarük edir. Eyni zamanda Kiyev Rusiyanın təkidi ilə sülh razılaşmasına Donbasın bütün ərazisindən Ukrayna qoşunlarının çıxarılması şərtinin daxil edilməsinə qarşı çıxır.
Hündürlükdə yerləşən Pokrovsk, Avdeyevkanın ələ keçirilməsindən sonra Rusiyanın nəzarətinə keçə biləcək ilk şəhər ola bilər. Mənbələr bildirir ki, Moskva bu mövqelərin verdiyi üstünlüklərdən, xüsusilə dronlar üçün əlverişli yüksəkliklərdən istifadə edərək Slavyansk və Kramatorsku doğru yeni hücumlar planlaşdırır.
Aliyə
