Portuqaliyada sağçı azlıq hökumətinin əmək islahatına qarşı keçirilən ümumi tətil xüsusilə nəqliyyat sektoruna ciddi təsir göstərib.
Hökumətin təklif etdiyi əmək islahatına etiraz edən əmək birliyinin çağırışı ilə ölkədə 12 ildən sonra 24 saatlıq ümumi tətil həyata keçirilib.
Paytaxt Lissabonda metro stansiyaları gecə yarısından etibarən bağlanıb, ölkə üzrə şəhərlərarası avtobus və qatar səfərləri dayandırılıb.
Həmçinin hava yolu nəqliyyatında da ciddi pozuntular yaşanıb. Air Europa Portuqaliya ilə bağlı bütün uçuşlarını ləğv edib, Iberia uçuşlarını 75% azaldıb, TAP Portugal və digər hava yolu şirkətləri isə minimal xidmət göstərib.
Əmək birlikləri hökumətin təklif etdiyi islahatın işdən çıxarılmaları asanlaşdırdığını, iş saatlarını sərbəstləşdirdiyini və əmizdirmə icazəsi kimi hüquqlara mənfi təsir etdiyini bildirir.
Portuqaliya İşçi Birlikləri Ümumi Konfederasiyası–Milli Birliklər İttifaqı (CGTP-IN) Baş Katibi Tiago Oliveira mətbuata açıqlamasında deyib ki, hökumət sabit həyat və gələcəyə ümid verən şərəfli yaşam haqqını aradan qaldırmaq istəyir.
Ümumi tətil səbəbindən paytaxt Lissabon da daxil olmaqla ölkənin bir çox şəhərində nümayişlər təşkil olunub.
Portuqaliyada 18 mayda keçirilən erkən ümumi seçkidən sonra sağçı Demokratik Alyansın (AD) lideri və Baş Nazir Luis Montenegro-nun qurduğu azlıq hökuməti ilk dəfə bu qədər kəskin etirazla üzləşib.
Ölkədə müxalifətdə olan solçu siyasi partiyalar da hökumətdən əmək islahatını geri götürməyi tələb edib.
