Berlin, 12 dekabr, AZƏRTAC
Avropa İttifaqının (Aİ) rəhbər qurumları 2035-ci ildən qüvvəyə minməsi planlaşdırılan daxiliyanma mühərriklərinin qadağasının yumşaldılması ilə bağlı mövqeləri razılaşdırır.
AZƏRTAC “Spiegel” nəşrinə istinadla xəbər verir ki, Avropa Komissiyası yeni avtomobillər üçün 100 faiz emissiyasızlıq tələbinin əvəzinə CO₂ emissiyalarının 90 faiz azaldılması variantını nəzərdən keçirir. Bu, təsdiqlənəcəyi halda əvvəlki qərarın faktiki olaraq ləğvi demək olacaq. Mövcud qaydalara görə, 2035-ci ildən etibarən Aİ-də yeni avtomobillərin karbon qazı emissiyası buraxması qadağandır.
Təklif mühafizəkar fraksiyalar tərəfindən müdafiə olunsa da, Avropa Parlamentinda Yaşılların və Sosial Demokratlar Partiyasının üzvləri prosesi qeyri-şəffaf və demokratiyaya zidd adlandıraraq sərt tənqid ediblər. Deputatlar Ursula Fon der Lyayen və Avropa Xalq Partiyası rəhbərliyinin digər fraksiyalarla məsləhətləşmədən bu qərara gəldiklərini bildiriblər. Qaydalara dəyişiklik edilməsinin təsdiqlənməsi üçün Avropa İttifaqı Şurasında əhalinin 65 faizini təmsil edən ən azı 15 üzv dövlətin razılığı tələb olunur.
Komissiya sənaye nümayəndələrinin və bir sıra üzv ölkələrin narahatlıqlarından sonra mövcud emissiya standartlarının yenidən nəzərdən keçiriləcəyini açıqlayıb. Bununla bağlı hüquqi təkliflərin yaxın günlərdə təqdim ediləcəyi gözlənilir.
Elvin Mövsüm
AZƏRTAC-ın xüsusi müxbiri
Berlin
