Bizimyol saytından verilən məlumata əsasən, ain.az məlumatı açıqlayır.
Məktəb dedikdə ağıla gələn ilk anlayış sağlam və təhlükəsiz bir mühit olur. Ancaq paradoks ondadır ki, bəzən elə bu mühitin içində, məktəb bufetlərinin qapısı arxasında uşaqlarımız üçün gözə görünməyən bir təhlükə gizlənir. Bufetlərdə satılan ucuz, rəngli, cazibədar, amma qida dəyəri aşağı olan paket məhsullar məsələn, çipslər, qazlı içkilər, emal olunmuş şirniyyatlar uşaqlar üçün “asan seçim”, valideynlər üçün isə artan narahatlıqların mənbəyinə çevrilib.
Hər gün minlərlə uşaq dərs arasında özlərini doyurmaq üçün bu məhsullara üz tutur. Onları cəlb edən dad və paketlərin parlaqlığıdır, amma görünməyən tərəfdə sağlamlığa ciddi ziyan dayanır. Artıq çəki, erkən yaşda piylənmə, diqqət və yaddaş zəifliyi, şəkərli içkilərin yaratdığı risklər, sürətli enerji verib dərhal düşən şəkər səviyyəsi və s. bunların hamısı məktəb yaşlı uşaqlar üçün real təhlükədir. Bu qidalar bir neçə dəqiqəlik zövq bəxş etsə də, uzunmüddətli nəticələri həm fiziki, həm də zehni sağlamlıq üçün ağırdır.
Problemin kökü isə yalnız uşaqların seçimində deyil. Bufetlərdə sağlam qida alternativlərinin azlığı, nəzarət boşluqları, marketinqin uşaqları hədəf alan cazibəsi və “ucuz olsa, kifayətdir” yanaşması məsələnin daha da dərinləşməsinə səbəb olur. Məktəbin içində təhsillə bərabər sağlam həyatın da təbliğ olunduğu bir mühit gözlənildiyi halda, uşaqların ilk toxunduğu məhsulun zərərli olması məntiqi ziddiyyət yaradır.
Burada məsuliyyət tək bir tərəfin üzərinə düşmür. Valideyn uşağına sağlam vərdiş aşılamalı, məktəb rəhbərliyi qida satışını ciddi nəzarətdə saxlamalı, bufet sahibləri isə qazancla yanaşı sosial məsuliyyət daşıdıqlarını unutmamalıdır. Uşaq nəyi görürsə, nə əlçatan olursa, onu alır. Əgər sağlam seçim onun qarşısında dayanırsa, bu, həm vərdişlərinə, həm də gələcək sağlamlığına müsbət təsir edəcək.
Əsl həll yolu zərərli qidaları qadağan etməklə kifayətlənmək deyil, onların yerinə sağlam, dadlı və əlçatan alternativlər təqdim etməkdir. Təbii şirələr, meyvə dilimləri, keyfiyyətli sendviçlər, duzsuz çərəzlər həm uşaqların enerjisini təmin edər, həm də ziyan verməz. Məktəb bufeti sadəcə alış-veriş yeri deyil, uşağın sağlamlıqla bağlı ilk gündəlik qərar verdiyi məkanlardan biridir.
Gələcəyi sağlam nəsillər üzərində qurmaq istəyiriksə, məktəb bufetlərindəki bu görünməz təhlükəni görməzliyə vura bilmərik. Uşaqların zəkasını biliklə, bədənini isə düzgün qidalanma ilə bəsləmək həm valideynin, həm də cəmiyyətin borcudur. Məktəb onların inkişaf etdiyi yerdirsə, bufet də bu inkişafı dəstəkləyən mühit olmalıdır, zərərli vərdişlərin başlanğıcı deyil.
Leyla Mirzə, Bizimyol.info
Hadisənin gedişatını izləmək üçün ain.az saytında ən son yeniliklərə baxın.
