Müəllif: Tamara Mustafayeva, Banco.az
"Oracle" şirkəti "OpenAI" məlumat mərkəzi layihələrini 2028-ci ilə təxirə salıb.
Banco.azxəbər verir ki, “Bloomberg”ə danışan mənbələrin bildirdiyinə görə, “Oracle Corp.” süni intellekt modeli istehsalçısı “OpenAI” üçün inşa etdiyi bəzi məlumat mərkəzlərinin tamamlanma tarixlərini 2027-ci ildən 2028-ci ilə təxirə salıb.
Mənbələr qeyd ediblər ki, bu gecikmələr əsasən işçi qüvvəsi və material çatışmazlığından qaynaqlanır.
“Oracle” bu yay imzalanmış 300 milyard dollarlıq müqavilə çərçivəsində “OpenAI”ın modellərinin təlimi və işlədilməsi üçün zəruri olan hesablama gücünü təmin etmək məqsədilə işlərini davam etdirir. Gecikmələrə baxmayaraq, ABŞ-da həyata keçirilən layihələrin vaxt cədvəlləri, dünyanın ən böyük obyektlərindən bəzilərinin inşa ediləcəyi bu sahələr üçün hələ də iddialı hesab olunur.
“Oracle” və “OpenAI” “Bloomberg”ə açıqlama verməkdən imtina ediblər. Bu xəbərdən sonra Oracle-ın səhmləri 6,5 faiz dəyər itirib. Cümə günü Nyu-Yorkda saat 11:03-də səhmlər 5,3 faiz azalaraq 188,26 dollara düşüb.
Bizi sosial şəbəkələrdən izləyin!!
