Darçın təkcə mətbəximizə gözəl qoxu və dad qatmaqla kifayətlənmir. Əsrlərdir həm şirniyyatların qəhrəmanı, həm də təbii “müalicə vasitəsi” kimi tanınır. Soyuq günlərdə isti çayın içinə düşən bir çubuq darçının yaydığı o istilik hissi, sanki bu ədviyyatın sirli gücündən xəbər verir. Lakin darçın düşündüyümüzdən daha maraqlı xüsusiyyətlərə malikdir: həm faydaları, həm də ehtiyatla yanaşılmalı tərəfləri var.
“Yeni Sabah” bu barədə araşdırıb:
Darçın həm xoş ətri, həm də faydalı xüsusiyyətləri ilə tanınan ədviyyatdır. Yeməklərə, şirniyyatlara və içkilərə əlavə olunduqda dadı gücləndirir, eyni zamanda müəyyən sağlamlıq təsirləri də yarada bilər. Bununla belə, darçından istifadə edərkən bəzi məqamlara diqqət etmək vacibdir.
Darçının ən çox göstərilən faydalarından biri onun antimikrob təsiridir. Bu ədviyyat bəzi bakteriya və göbələklərin çoxalmasını zəiflədə bilir. Həmçinin güclü antioksidant mənbəyi olduğu üçün bədəndə sərbəst radikalların yaratdığı zərəri azaltmağa kömək edir. Darçın bəzi insanlarda həzmi yüngülləşdirir, şişkinlik və ağırlıq kimi narahatlıqların azalmasına şərait yaradır. Soyuq mövsümlərdə çay və içkilərə darçın əlavə etmək immunitetin möhkəmlənməsinə dəstək ola bilər.
Bununla yanaşı, darçının ehtiyat tələb edən tərəfləri də var. Onun bəzi növlərində, xüsusilə kasia darçınında kumarin adlı maddə olur və bu maddənin çox miqdarda qəbul edilməsi qaraciyər üçün zərərli ola bilər. Bu səbəbdən darçını həddindən artıq istifadə etmək məsləhət görülmür. Həmçinin bəzi insanlarda darçın allergik reaksiyalar – dəri qaşınması, ağızda yanma və qıcıqlanma yarada bilər. Mədə həssaslığı olan şəxslərdə isə darçının çox miqdarı yanma və narahatlıq hissinə səbəb ola bilər.
Qeyd edək ki, darçın düzgün miqdarda istifadə edildikdə həm dad, həm də sağlamlıq baxımından faydalı ola bilər. Lakin onu ölçülü qəbul etmək və şəxsi həssasiyyətləri nəzərə almaq vacibdir.
Nazim Hacıyev
Telegram kanalımız
