BAKI, 16 dekabr. TELEQRAF
Noyabrda Türkiyədə əcnəbilərə, ümumilikdə, 1943 ev satılıb. Azərbaycan vətəndaşları isə ötən ay qonşu dövlətdən 90 daşınmaz əmlak alıblar. Bu göstərici ötən ilin eyni ayı ilə müqayisədə 21.6% artıb.
Teleqraf Türkiyə Statistika Təşkilatına (TÜİK) istinadən xəbər verir ki, noyabrda qonşu ölkədə xaricilərə mənzil satışı əvvəlki ilin eyni dövrünə görə 8,2% azalıb. Yanvar-sentyabr aylarında isə əcnəbilərə mənzil alqı-satqısı ötən ilin eyni dövrü ilə müqayisədə 35,1% azalaraq 21 363 təşkil edib.
Ötən ay ən çox daşınmaz əmlak Rusiya Federasiyası vətəndaşlarına satılıb (421). İkinci yerdə İran vətəndaşları qərarlaşıb – onlar Türkiyədən 200 ev alıb. Ukrayna vətəndaşları isə ötən ay 160 mənzil alaraq üçüncü yerdə qərarlaşıblar.
Xatırladaq ki, oktyabrda azərbaycanlılar Türkiyədən 96 mənzil alıb.
