Azertag saytından alınan məlumata görə, ain.az bildirir.
Bakı, 17 dekabr, AZƏRTAC
Azərbaycan Dövlət Akademik Opera və Balet Teatrı dünya musiqi xəzinəsinin incilərindən sayılan Cüzeppe Verdinin "Aida" operası təqdim edəcək. Möhtəşəm səhnə əsəri 12 mart saat 19:00-da Heydər Əliyev Sarayında nümayiş olunacaq. Dörd pərdəli operanın budəfəki nümayişi xüsusi əhəmiyyət kəsb edir.
Bu barədə AZƏRTAC-a Opera və Balet Teatrından məlumat verilib.
Bildirilib ki, tamaşada Radames partiyasını dünyaşöhrətli tenor, Azərbaycanın Xalq artisti Yusif Eyvazov ifa edəcək.
Səhnə əsərində Yusif Eyvazovla yanaşı, Azərbaycanın tanınmış opera ifaçıları Xalq artistləri Əvəz Abdulla, Fidan Hacıyeva, Əkrəm Poladov, Gülnaz İsmayılova, Əməkdar artist Afaq Abbasova, solistlər İqor Yadrov, Fəhmin Əhmədli çıxış edəcəklər.
Tamaşanın musiqi rəhbəri və dirijoru İtaliyadan dəvət olunmuş məşhur dirijor Mikelanjelo Mazzadır (Michelangelo Mazza).
Səhnə əsərinin quruluşçu rejissoru Əməkdar incəsənət xadimi Əli Usubov, rejissoru Əməkdar incəsənət xadimi Hafiz Quliyevdir. Baletmeyster SSRİ Xalq artisti Qəmər Almaszadənin, xormeyster isə Əməkdar incəsənət xadimi Sevil Hacıyevadır.
Biletləri iTicket.az saytından və şəhərdəki kassalardan əldə etmək mümkündür.
Hadisənin gedişatını izləmək üçün ain.az saytında ən son yeniliklərə baxın.
