Yeni aparılan bir araşdırma yaşlı qadınlarda gündəlik çay və ya qəhvə seçiminin sümük sağlamlığına təsir göstərə biləcəyini üzə çıxarıb. Avstraliyanın Flinders Universitetinin ictimai səhiyyə üzrə tədqiqatçıları 65 yaşdan yuxarı təxminən 9 700 amerikalı qadının çay və qəhvə istehlakı vərdişlərini araşdıraraq bu içkilərin osteoporoz riski ilə əlaqəsini qiymətləndiriblər.
Manset.az xarici mediaya istinadən xəbər verir ki, osteoporoz xüsusilə 50 yaşdan yuxarı qadınlarda geniş yayılmış xəstəlikdir. Sümük toxumasının dağılması ilə yenilənməsi arasındakı tarazlığın pozulması nəticəsində sümüklər kövrək olur və sınıq riski artır. Menopozdan sonra estrogen hormonunun azalması qadınları bu xəstəliyə qarşı daha həssas vəziyyətə salır.
Təxminən 10 il ərzində aparılan sorğular və sümük mineral sıxlığı ölçmələri müntəzəm olaraq çay içən qadınlarda bud-çanaq nahiyəsində sümük sıxlığının çay içməyənlərlə müqayisədə əhəmiyyətli dərəcədə yüksək olduğunu göstərib. Tədqiqatçılar çayın tərkibində olan katexin adlı maddələrin sümük toxumasının yaranmasına cavabdeh hüceyrələri dəstəkləyə biləcəyini bildirirlər. Bu müsbət təsir artıq çəkisi olan qadınlarda daha qabarıq şəkildə müşahidə edilib.
Qəhvə istehlakı isə daha mürəkkəb nəticələr ortaya qoyub. Gündə beş fincandan artıq qəhvə içən qadınlarda sümük mineral sıxlığının daha aşağı olduğu qeydə alınıb. Həmçinin yüksək miqdarda spirtli içki qəbul edən qadınlarda qəhvənin bud sümüyünün sıxlığına mənfi təsir göstərdiyi müəyyən edilib.
Tədqiqatçılar bu nəticələrin qəhvədən tamamilə imtina etməyi zəruri etmədiyini vurğulayır, eyni zamanda ölçülü çay istehlakının yaşlı qadınlar üçün sümük sağlamlığını dəstəkləyən sadə bir vərdiş ola biləcəyini qeyd edirlər. Araşdırma Nutrients elmi jurnalında dərc olunub.
