ABŞ Milli Standartlar və Texnologiya İnstitutunun (NIST) tədqiqatçıları Mars səthindəki saatların Yerə nisbətən gündə orta hesabla 477 mikrosaniyə daha sürətli işlədiyini açıqlayıblar. Bu kiçik fərq, Yer, Ay və Mars arasında zamanın dəqiq sinxronlaşdırılmasının vacib olduğu missiyalarda kritik əhəmiyyət kəsb edir.
Manset.az xarici mediaya istinadən xəbər verir ki, Eynşteynin ümumi nisbilik nəzəriyyəsinə görə, zaman kütlə tərəfindən təsirlənir. Daha güclü cazibə sahəsindəki saatlar xaricdən müşahidə edildikdə daha yavaş işləyir. Əksinə, daha zəif cazibə sahəsində keçən bir saniyə güclü cazibə altında ölçülən saniyədən daha qısa olur. Məsələn, GPS peyklərindəki atom saatları Yer səthindəki saatlardan gündə 38 mikrosaniyə daha sürətli işləyir.
NIST-dən Neil Ashby və Bijunath Patla Mars üçün dəqiq zaman ölçmə sistemi hazırlayıblar. Marsın Yerə nisbətən təxminən onda bir kütləyə sahib olması və Günəşdən 1,5 AU məsafədə yerləşməsi səbəbindən səthdəki cazibə Yer səthindəkinin təxminən beşdə biri qədərdir. Bundan əlavə, Marsın elliptik orbit hərəkəti il ərzində cazibə potensialında 266 mikrosaniyəlik dalğalanmalara səbəb olur.
Tədqiqatçılar bildirirlər ki, bu iş Marsda gələcək insanlı missiyalar və planetlərarası rabitə, naviqasiya sistemləri üçün əsas rol oynayacaq. Patla qeyd edib: “Zaman, Ay və Mars üçün indi tam uyğun vəziyyətdədir”, – deyə, Günəş Sisteminə yayılan insan varlığı vizyonuna bir addım daha yaxınlaşdıqlarını vurğulayıb.
Tədqiqatın nəticələri The Astronomical Journal jurnalında dərc olunub.
