ain.az, Bizimyol portalına istinadən məlumat yayır.
Cənubi Koreyanın Birləşmə Nazirliyi əməkdaşlarının prezidentə Şimali Koreyanın (KXDR) ayrıca dövlət kimi tanınması məqsədilə Konstitusiyaya dəyişiklik edilməsi ideyasını irəli sürdüyü barədə yayılan məlumatları təkzib edib.
Bizimyol.info xəbər verir ki, bu barədə nazirliyin rəsmi nümayəndəsi Yun Min Ho brifinq zamanı açıqlama verib.
Onun sözlərinə görə, bəzi KİV-lərdə 19 dekabr tarixində keçirilmiş qapalı iclasda Birləşmə Nazirliyinin Şimali Koreyanı dialoqa qaytarmaq üçün Konstitusiyaya dəyişiklik edilməsinin vacibliyini irəli sürdüyünə dair yayılan məlumatlar həqiqətə uyğun deyil. Qeyd olunub ki, Cənubi Koreya Konstitusiyasına əsasən, Koreya yarımadasının bütün ərazisi respublikanın tərkib hissəsi hesab olunur. Öz növbəsində, Pxenyan daha əvvəl Cənubi Koreyanı ayrı və düşmən dövlət kimi qəbul etdiyini bəyan edib və bu mövqenin ölkənin əsas qanununda təsbit olunmasını təklif edib.
“Prezidentə təqdim olunan məruzə zamanı Birləşmə Nazirliyi konstitusiya islahatları məsələsini qaldırmayıb, bu mövzu müzakirə olunmayıb”, – deyə Yun Min Ho bildirib və yol verilmiş təhriflərdən təəssüf etdiyini vurğulayıb.
Dekabrın 22-də “Çunan İlbo” qəzeti yazmışdı ki, nazirlik əməkdaşlarından biri prezidentə təqdim olunan məruzənin qapalı hissəsində Yonse Universitetinin professoru, KXDR üzrə ekspert Mun Conq İnin dialoqu canlandırmaq üçün Cənubi Koreya Konstitusiyasının 3-cü maddəsinin dəyişdirilməsinin zəruriliyi barədə fikrini səsləndirib. Professorun sözlərinə görə, Pxenyan Seulun KXDR-i özünə birləşdirməyə çalışdığından ehtiyat edir və onu bərabərhüquqlu dövlət kimi tanımaq dialoqa təkan verə bilər.
Cənubi Koreya Prezidenti Li Cje Mön bu mövqedən xəbərdar olduğunu bildirsə də, Konstitusiyaya yenidən baxılmasını olduqca çətin məsələ adlandırıb. “Bu, çox mürəkkəbdir. Siyasət idealist arzulara deyil, reallığa əsaslanmalıdır”, – deyə prezident qeyd edib. Bundan sonra qəzetin məlumatına görə, Birləşmə Nazirliyinin digər yüksəkvəzifəli əməkdaşı bu fikrin rəsmi mövqe deyil, ayrı-ayrı məmurun şəxsi rəyi olduğunu izah etməyə tələsib.
Məruzə zamanı Birləşmə naziri Çon Don Yon KXDR-ə qarşı sanksiyaların artıq effektiv olmadığını bildirib və 2010-cu ildə tətbiq edilən məhdudiyyətlərin ləğvini təklif edib. Prezident Li Cje Mön isə buna cavab olaraq, “Artıq işləməyən bir tədbirin ləğvini elan etməyin praktik faydası nədir?” deyə sual verib. Daha əvvəl nazir Çon Don Yon Koreya yarımadasında faktiki olaraq iki dövlətin mövcud olduğunu bildirmişdi. Prezident administrasiyası isə bu bəyanatın Seulun rəsmi mövqeyini əks etdirmədiyini vurğulayıb. Bundan əlavə, prezident ofisi ilə nazir arasında ABŞ-la birgə hərbi təlimlərin dialoq naminə dayandırılması məsələsində də ziddiyyətli mövqelər səsləndirilib.
Bizimyol.info
Daha ətraflı məlumat və yeniliklər üçün ain.az saytını izləyin.
