Luiziana ştatının qubernatoru Ceff Lendri bu vəzifəni qubernator postu ilə paralel icra edəcək...
ABŞ prezidenti Donald Tramp Qrenlandiya üzrə xüsusi elçi vəzifəsinə Luiziana ştatının qubernatoru Ceff Lendrini təyin edib.
Poliqon xəbər verir ki, bu barədə Reuters agentliyi məlumat yayıb. Bildirilir ki, Lendri xüsusi elçi statusunu hazırkı qubernator vəzifəsi ilə eyni vaxtda icra edəcək.
Donald Tramp qərarla bağlı Truth Social sosial şəbəkəsində paylaşım edərək bildirib ki, Ceff Lendri Qrenlandiyanın ABŞ-nin milli təhlükəsizliyi baxımından nə qədər vacib olduğunu yaxşı anlayır və ölkənin maraqlarını qətiyyətlə irəli aparacaq. Trampın sözlərinə görə, bu təyinat Vaşinqtonun strateji maraqlarına xidmət edir.
Ceff Lendri isə X sosial şəbəkəsində cavab paylaşımı edərək qeyd edib ki, Qrenlandiyanın ABŞ-nin tərkibinə daxil olması üçün könüllü əsasda bu vəzifədə xidmət göstərmək onun üçün böyük şərəfdir. O, bu missiyanı milli maraqlar baxımından mühüm hesab etdiyini vurğulayıb.
Xatırladılır ki, Donald Tramp daha əvvəl dəfələrlə Qrenlandiyanı ABŞ-yə birləşdirmək niyyətini açıq şəkildə ifadə edib. Bu bəyanatlar Qrenlandiya üzərində nəzarəti həyata keçirən Danimarka tərəfindən kəskin tənqid olunub. Kopenhagen rəsmi şəkildə bildirib ki, Qrenlandiya satılmır və bu cür təşəbbüslər ölkənin suverenliyinə ziddir.
Ekspertlər hesab edirlər ki, xüsusi elçi təyinatı Tramp administrasiyasının Qrenlandiya məsələsini yenidən gündəmin ön sıralarına çıxardığını və Arktika bölgəsində geosiyasi maraqların gücləndirilməsi istiqamətində addımlar atıldığını göstərir.
Poliqon.info
