Vaşinqton qeyri-leqal miqrasiyanı azaltmaq üçün könüllü çıxışı maliyyə stimulu ilə təşviq edir...
Poliqon xəbər verir ki, ABŞ hakimiyyəti ölkədə qeyri-leqal miqrantların sayını azaltmaq məqsədilə tədbirləri sərtləşdirir və ilin sonunadək ölkəni könüllü tərk etməyə razılaşan miqrantlara maliyyə ödənişi təklif edir. Bu barədə Reuters agentliyi məlumat yayıb.
Məlumata görə, Vaşinqtonun immiqrasiya siyasəti büdcəyə və təhlükəsizlik sisteminə düşən yükün azaldılması zərurəti ilə əsaslandırılaraq daha da sərtləşdirilir. Bu çərçivədə əsas mexanizmlərdən biri “özünü deportasiya” proqramıdır və onun şərtləri əhəmiyyətli dərəcədə yenilənib.
ABŞ Daxili Təhlükəsizlik Nazirliyi bildirib ki, prezident Donald Tramp administrasiyası könüllü şəkildə ölkəni tərk etməyə razılaşan miqrantlar üçün nəzərdə tutulan ödənişin məbləğini üç dəfə artırıb. Beləliklə, sözügedən “təqaüd”ün həcmi 3 000 dollara çatdırılıb. Bu məbləği ABŞ ərazisində qeyri-leqal şəkildə olan və cari ilin sonunadək rəsmi qaydada çıxış sənədlərini rəsmiləşdirən şəxslər ala biləcək.
Proqram çərçivəsində miqrantlara mənşə ölkələrinə pulsuz aviabiletin verilməsi də nəzərdə tutulur. Nazirlik vurğulayıb ki, bu tədbir dövlət xərclərinin azaldılmasına yönəlib. DHS-in hesablamalarına görə, hüquqi statusu olmayan bir şəxsin saxlanılması, həbs edilməsi və deportasiyası orta hesabla təxminən 17 min dollara başa gəlir.
ABŞ daxili təhlükəsizlik naziri Kristi Noem bu təşəbbüsü şərh edərək bildirib: “Qeyri-leqal əcnəbilər bu hədiyyədən istifadə edib özləri deportasiya olunmalıdırlar, çünki əks halda biz onları tapacaq, həbs edəcək və onlar bir daha geri qayıda bilməyəcəklər”, — deyə Kristi Noem qeyd edib.
Prosedurun sadələşdirilməsi məqsədilə mart ayında CBP Home adlı yenilənmiş mobil xidmət istifadəyə verilib. Bu tətbiq könüllü çıxış üçün qeydiyyatın aparılmasına imkan yaradır. Daha əvvəl CBP One adlı analoji tətbiqdən əvvəlki administrasiya dövründə miqrantların ABŞ-yə leqal girişinin təşkili üçün istifadə olunurdu.
Poliqon.info
