Moskva və Braziliya arasında hesablaşmaların rublla və real ilə aparılması genişləndirilə bilər, lakin problemlər qalır...
Poliqon xəbər verir ki, Rusiya və Braziliya ikitərəfli ticarətdə milli valyutalardan — rubl və Braziliya realından — istifadənin həcmini artırmağa çalışır. Bu barədə Braziliyanın Moskvadakı səfiri Serjio Rodrigeş dos Santos məlumat verib.
Diplomatın sözlərinə görə, bu istiqamətdə əsas maneə Braziliyanın Rusiya ilə ticarətdə üzləşdiyi ciddi kəsirdir. “Bizim Rusiya ilə ticarətdə əhəmiyyətli defisitimiz var və bu problemin necə həll edilə biləcəyi üzərində düşünməliyik”, — deyə səfir TASS agentliyinə açıqlamasında bildirib. O vurğulayıb ki, hazırda Rusiya və Braziliya arasında milli valyutalarla aparılan hesablaşmaların həcmi Rusiyanın Çin və ya Hindistanla ticarətindəki göstəricilərlə müqayisədə xeyli aşağıdır.
Serjio Rodrigeş dos Santos qeyd edib ki, milli valyutalarda ticarətin genişləndirilməsi üçün maliyyə mexanizmlərinin təkmilləşdirilməsi, banklararası əməkdaşlığın dərinləşdirilməsi və ticarət balansında disproporsiyaların aradan qaldırılması vacibdir. Onun fikrincə, bu addımlar həm Braziliya, həm də Rusiya üçün maliyyə risklərinin azaldılmasına və qarşılıqlı iqtisadi asılılığın güclənməsinə töhfə verə bilər.
Xatırladaq ki, BRİKS platforması çərçivəsində qarşılıqlı hesablaşmaların milli valyutalarda aparılması mexanizmi 2025-ci ilin iyul ayında işə salınıb. “İzvestiya” nəşrinin məlumatına görə, hazırda bu cür əməliyyatların payı Rusiya–Braziliya ikitərəfli ticarətinin ümumi həcminin təxminən 5–10 faizi səviyyəsində qiymətləndirilir.
Poliqon.info
