Yeni Yasamal ərazisində, Şərur MTK-nın yaxınlığında sürücülərdən birinin avtomobili düzgün olmayan şəkildə saxlaması piyadalar üçün ciddi çətinlik yaradıb.
AzPost-a verilən məlumata görə, avtomobil səkini tam bağladığı üçün insanlar yolu keçə bilməyib. Hadisə ərazidə yaşayan sakinlərin narazılığına səbəb olub.
Şahidlərin sözlərinə görə, sürücü avtomobili elə vəziyyətdə saxlayıb ki, nə yaşlılar, nə də uşaqlar təhlükəsiz şəkildə hərəkət edə biliblər. Bu cür davranış piyadaların hüquqlarının açıq şəkildə pozulması kimi qiymətləndirilir. Sakinlər bildirirlər ki, belə hallar son vaxtlar tez-tez təkrarlanır.
Qeyd olunur ki, avtomobilin dövlət qeydiyyat nişanı 77 UO 308 olub. Vətəndaşlar sürücüləri daha məsuliyyətli olmağa, qaydalara əməl etməyə çağırırlar. Onların fikrincə, yol hərəkəti qaydalarına hörmətsizlik həm təhlükə yaradır, həm də cəmiyyətdə narazılığı artırır.
