"Ukrayna Prezidenti Volodimir Zelenskinin təqdim etdiyi sülh planına baxdıqda görürük ki, məqsəd həm humanitar vəziyyətin yaxşılaşdırılması, həm də işğal altındakı ərazilərin statusu barədə qarşılıqlı razılığın əldə olunmasıdır. Analitik baxımdan bu təşəbbüs yalnız daxili auditoriya üçün deyil, həm də beynəlxalq ictimaiyyətə Ukraynanın kompromisə hazır olduğunu və sülhə öncülük etdiyini nümayiş etdirmək məqsədi daşıyır. Bu, Kiyevin həm siyasi, həm də diplomatik strategiyasının mərkəzi elementi kimi dəyərləndirilə bilər. Lakin Moskvanın planı qəti şəkildə rədd etməsi hazırkı geosiyasi şəraitdə real sülh imkanlarını ciddi şəkildə məhdudlaşdırır. Rusiya tərəfinin “Novorossiya” diskursunu yenidən gündəmə gətirməsi yalnız ərazi iddialarını genişləndirmir, həm də diplomatik danışıqların perspektivini mürəkkəbləşdirir".
Bu fikirləri Aznews.az-a açıqlamasında siyasi şərhçi Rəşad Bayramov deyib.
Qeyd edək ki, Ukrayna–Rusiya müharibəsi ilə bağlı irəli sürülən sülh təşəbbüsləri beynəlxalq gündəmdə qalmaqda davam edir. Ukrayna Prezidenti Volodimir Zelenskinin təqdim etdiyi sülh planı rəsmi Kiyev üçün prinsipial yol xəritəsi hesab edilsə də, Moskva tərəfindən açıq şəkildə rədd olunur. Ukrayna parlamentində səslənən son açıqlamalar da göstərir ki, tərəflər arasında mövqelər təkcə yaxınlaşmır, əksinə, daha da sərtləşir. Xüsusilə Rusiyanın tələblərinin genişlənməsi və “Novorossiya” diskursunun yenidən gündəmə gətirilməsi diplomatik perspektivləri sual altına alır. Mövcud vəziyyət fonunda real sülh imkanlarının olub-olmaması beynəlxalq ictimaiyyət üçün də aktual mövzuya çevrilib.
Siyasi şərhçi qeyd edib ki, bu yanaşma tərəflər arasında mövqelərin yaxınlaşmadığını, əksinə, daha da sərtləşdiyini göstərir.
