Ukrayna paytaxtının yeddi rayonunda dağıntılar, yaşayış binalarında yanğınlar qeydə alınıb...
Poliqon xəbər verir ki, Rusiyanın Kiyevə endirdiyi növbəti raket və dron zərbələri nəticəsində azı 11 nəfər xəsarət alıb. Yaralılardan 8-i müxtəlif tibbi dərəcəli xəsarətlərlə paytaxtın xəstəxanalarına yerləşdirilib, qalanlarına yerində tibbi yardım göstərilib.
Hücumlar nəticəsində Dneprovski, Şevçenkovski və Desnyanski rayonlarında çoxmərtəbəli yaşayış binalarında yanğınlar baş verib. Ümumilikdə paytaxtın 7 rayonunda yaşayış və mülki infrastruktur obyektlərinə ziyan dəyib. Fövqəladə hallar xidmətləri yanğınların söndürülməsi və dağıntıların aradan qaldırılması üçün işləri davam etdirir.
Zərbələr Kiyevin kommunal təsərrüfatına da ciddi təsir göstərib. Hazırda şəhərin təxminən üçdə biri istilik təchizatından məhrumdur. Sol sahilin bir sıra rayonlarında elektrik enerjisinin verilişində fasilələr yaranıb və bu səbəbdən fövqəladə elektrik kəsintiləri tətbiq edilib.
Atəşə tutulma zamanı Milli Aviasiya Universitetinin yataqxanasına da ziyan dəyib, binanın lift şaxtasına mərmi düşdüyü bildirilir. Hadisə zamanı tələbələrin təxliyəsi həyata keçirilib, əlavə təhlükəsizlik tədbirləri görülür.
Yanğınlar səbəbindən Kiyev üzərində tüstü qatı əmələ gəlsə də, rəsmi qurumların məlumatına görə, 27 dekabr səhər saatlarına olan vəziyyətdə paytaxtda atmosfer havasının çirklənmə səviyyəsi aşağı olaraq qiymətləndirilib. Monitorinqlər davam etdirilir və sakinlərə ehtiyatlı olmaları tövsiyə edilir.
Poliqon.info
