Qırğızıstanın keçmiş prezidenti Atambayev bütün dövlət mükafatlarından məhrum edilib.
Yeniavaz.com Qırğızıstan Prezdentinin mətbuat xidmətinə istinadla xəbər verir ki, bu barədə Prezident Sadır Japarov əmr imzalayıb.
“Qırğızıstan Prezidenti Sadır Japarov Bişkek şəhərinin Pervomayski Rayon Məhkəməsinin 3 iyun 2025-ci il tarixli hökmünə əsasən Almazbek Şarşenoviç Atambayevin dövlət mükafatlarından məhrum edilməsi barədə fərman imzalayıb”, - məlumatda qeyd edilib.
Keçmiş prezident Qırğızıstanın ən yüksək mükafatı olan “Qırğızıstan Qəhrəmanı”, 2-ci dərəcəli “Manas” ordeni, “Danaker” ordeni və “Dank” medalından məhrum edilib.
Baş Prokurorluğun Məhkəmə İcra Xidmətinə Atambayevin dövlət mükafatlarının sonradan dövlət mükafatları fonduna köçürülməsi üçün müsadirə edilməsi üçün tədbirlər görmək tapşırılıb.
Qeyd edək ki, Atambayev 2011-ci ildən 2017-ci ilə qədər Qırğızıstan prezidenti vəzifəsində çalışıb, bundan sonra rəsmi olaraq Qırğızıstan siyasətində fəal iştirak etməyib. 8 avqust 2019-cu ildə, təxminən 24 saat davam edən xüsusi əməliyyat zamanı Çuy bölgəsinin Koy-Taş kəndindəki iqamətgahında saxlanılıb. O, bir neçə cinayətdə ittiham olunub. Bu ittihamların bəzilərindən bəraət alıb, digərləri üçün isə həbs cəzasına məhkum edilib.
Atambayev azadlığa buraxılmazdan əvvəl üç ildən çox həbsxanada qalıb və demək olar ki, dərhal ölkəni tərk edib. Rəsmi versiyaya görə, o, müalicə üçün İspaniyaya gedib və orada qalıb.
