Qırğızıstan prezidenti Sadır Japarov keçmiş dövlət başçısı Almazbek Atambayevin bütün dövlət mükafatlarından məhrum edilməsi barədə fərman imzalayıb.
"Unikal" xəbər verir ki, fərman Qırğızıstan liderinin mətbuat xidməti tərəfindən dərc edilib.
Bu qərar Bişkek şəhərinin Pervomayski Rayon Məhkəməsinin 3 iyun 2025-ci il tarixli hökmünə əsaslanır. Atambayev ən yüksək mükafatı olan "Qırğızıstan Qəhrəmanı", 2-ci dərəcəli Manas ordeni, Danaker ordeni və "Dank" medalından məhrum edilib.
Baş Prokurorluğa və Məhkəmə İcraçıları Xidmətinə keçmiş prezidentdən mükafatları mümkün qədər tez müsadirə etmək tapşırılıb. Prosedur başa çatdıqdan sonra bütün fərqlənmə nişanları saxlanılması üçün müvafiq dövlət fonduna təhvil veriləcək.
Qərar keçmiş liderə qarşı uzunmüddətli məhkəmə proseslərindən sonra verilib. Atambayev əvvəllər bir sıra ittihamlarla təqsirli bilinib və bu ittihamlar qanunla onun fəxri adlarının və mükafatlarının ləğvini nəzərdə tutur.
Ağarza Elçinoğlu
