Rəsmi Riqa təhlükəsizlik tədbirlərini gücləndirdiyini bildirir...
Latviya Rusiya Federasiyası ilə dövlət sərhədi boyunca inşa edilən mühəndis-texniki qoruyucu hasarın tikintisini tam şəkildə yekunlaşdırıb.
Poliqon xəbər verir ki, bu barədə tikinti işlərini həyata keçirən şirkətə istinadən LETA agentliyi məlumat yayıb.
Məlumata görə, sərhəd boyunca çəkilən bu baryer qanunsuz miqrasiyanın qarşısının alınması, sərhəd təhlükəsizliyinin gücləndirilməsi və mümkün təxribat risklərinin azaldılması məqsədi daşıyır. Layihə çərçivəsində fiziki hasarla yanaşı, müşahidə və nəzarət elementləri də quraşdırılıb, bu isə sərhəd xidmətlərinin operativ imkanlarını artırmağa imkan verir.
Latviya hakimiyyəti daha əvvəl də bəyan edib ki, Rusiya ilə sərhəddə təhlükəsizlik tədbirlərinin gücləndirilməsi regionda dəyişən geosiyasi vəziyyət və Avropa İttifaqının xarici sərhədlərinin qorunması ilə bağlıdır. Rəsmi Riqa bu addımı milli təhlükəsizliyin təmin olunması baxımından vacib hesab edir.
Qeyd edək ki, son illər Baltik ölkələri, o cümlədən Latviya Rusiya və Belarusla sərhədlərində mühəndis maneələrinin qurulmasına xüsusi diqqət ayırır və bu istiqamətdə ardıcıl layihələr həyata keçirir.
Poliqon.info
