Google şirkəti istifadəçilərin əsas @gmail.com ünvanını dəyişməsi zamanı mövcud hesab məlumatlarının tam şəkildə qorunacağını açıqlayıb. Şirkətin bildirdiyinə görə, bu yenilik istifadəçilərin rəqəmsal tarixçəsinə və aktiv xidmətlərinə heç bir mənfi təsir göstərməyəcək.
Redaksiya məlumat verir ki, əsas elektron poçt ünvanı dəyişdirildikdə bütün məktublar, Google Drive faylları, fotoşəkillər, mesajlar, təqvim dəvətnamələri və alış tarixçəsi dəyişməz qalır. Köhnə Gmail ünvanı avtomatik olaraq alias statusu alır və həmin ünvana göndərilən məktublar eyni poçt qutusuna daxil olmağa davam edir.
Açıqlamaya əsasən, həm köhnə, həm də yeni ünvanla YouTube, Google Maps və Google Play daxil olmaqla bütün Google xidmətlərinə giriş mümkündür. Hesabın texniki əsası dəyişmədiyi üçün üçüncü tərəf inteqrasiyaları və abunəliklər də əlavə köçürmə tələb etmədən aktiv qalır.
Şirkət eyni zamanda bəzi məhdudiyyətləri də açıqlayıb. İstifadəçilər Gmail ünvanını yalnız on iki ayda bir dəfə dəyişə bilər və ümumilikdə bir hesab üçün maksimum üç dəyişiklik icazə verilir. Funksiya hazırda yalnız fərdi @gmail.com hesabları üçün keçərlidir və Google Workspace üzərindən idarə olunan iş və təhsil hesablarına şamil edilmir. Funksiyanın mərhələli şəkildə müxtəlif regionlarda istifadəyə verildiyi qeyd olunur.
