Limada keçirilən ənənəvi Yeni il ritualı zamanı Peru şamanları 2026-cı il üçün proqnozlarını açıqlayıblar. Onlar ABŞ prezidenti Donald Trampın ciddi bir xəstəliyə tutulacağını, Nikolas Maduronun məğlubiyyətini və Rusiyanın Ukraynaya qarşı müharibəsinin bitəcəyini proqnozlaşdırırlar.
Mərasim dekabrın sonlarında Peru paytaxtının cənub hissəsindəki sahildə baş tutub. “Reuters” xəbər verir ki, çimərlikdə toplaşan şamanlar dünya liderlərinin plakatları ilə ritual ayinlər yerinə yetiriblər.
Ritual zamanı şamanlar Donald Tramp, Nikolas Maduro, Vladimir Putin, Si Cinpin və Zelenskinin böyük şəkillərindən istifadə ediblər. Plakatlar qumun üzərinə düzülüb, sonra onların üzərində rituallar icra edilib.
Mərasim iştirakçılarından biri olan şaman Xuan de Dios Qarsía əsas proqnozları açıq şəkildə açıqlayıb. Onun sözlərinə görə, "ABŞ hazırlaşmalıdır, çünki Donald Tramp ağır xəstəliyə tutulacaq".
Venesueladakı vəziyyət və Ukraynadakı müharibə ilə bağlı danışan Qarsía, Karakasdakı mövcud hökumətin məğlubiyyətini və Şərqi Avropadakı silahlı münaqişənin bitməsini qabaqcadan gördüyünü bildirib.
O, Maduronun məğlub olacağını və ölkəni tərk edəcəyini, lakin tutulmayacağını bildirib. Onun sözlərinə görə, hadisələr sürətlə inkişaf edəcək, lakin o həbs olmayacaq.
Rusiyanın Ukraynaya qarşı müharibəsi ilə bağlı proqnoz beynəlxalq gündəmin əsas elementinə çevrilib. Şamana görə, münaqişə bitəcək və tərəflər "sülh bayrağını qaldıracaqlar". O, savaşın bitəcəyi tarixi və ya şərtlərini açıqlamayıb.
Peru şamanlarının mərasimi hər il dekabrın sonlarında keçirilir və ənənəvi olaraq dünya hadisələri ilə bağlı proqnozlarla müşayiət olunur.
Onu da qeyd edək ki, şamanlar əvvəllər Ukraynada müharibənin, xüsusən də 2023-cü ildə bitəcəyini proqnozlaşdırmışdılar, lakin bu baş vermədi.
TAHİR
