Dünən Venesuelanın paytaxtı Karakasda yerli vaxtla saat 02:00 radələrində azı 7 partlayış səsi və alçaqdan uçan təyyarələrin səsi eşidilib.
ABŞ Prezidenti Donald Trump bildirib ki, ABŞ Venesuelaya və ölkənin lideri Prezident Nicolas Maduroya qarşı genişmiqyaslı əməliyyat həyata keçirib və Maduro həyat yoldaşı ilə birlikdə ələ keçirilərək ölkə xaricinə çıxarılıb.
ABŞ Prezidenti Donald Trump, Venesuela Dövlət Prezidenti Nicolas Maduronun saxlanılmasına yönəlmiş əməliyyatın “çox uğurlu” olduğunu qeyd edib. "New York Times" nəşrinə danışan Trump, əməliyyatın uğurunun yaxşı planlama və sahədəki hərbi qüvvələrin peşəkarlığı sayəsində əldə edildiyini vurğulayıb.
Trump, “Çox yaxşı planlama var idi, çox güclü və yüksək ixtisaslı hərbçilər iştirak etdi. Açıq desək, son dərəcə uğurlu bir əməliyyat idi”, — deyə bildirib.
ABŞ Ədliyyə Nazirliyi Venesuela Prezidenti Nicolas Maduro və onun həyat yoldaşı Cilia Flores barəsində irəli sürülən ittihamları açıqlayıb.
Nazirliyin rəsmi internet saytında yayımlanan sənəddə Maduro “illərdir korrupsiyalaşmış və qeyri-legitim hökuməti idarə etməkdə” ittiham olunur. Sənəddə, həmçinin onun dövlət hakimiyyətindən narkotik qaçaqmalçılığı başda olmaqla qanunsuz fəaliyyətlər üçün sui-istifadə etdiyi bildirilir.
İddialara görə, Maduroya aid edilən narkotik qaçaqmalçılığı fəaliyyəti Venesuelanın hərbi və siyasi elitasının zənginləşməsinə xidmət edib. Sənəddə əlavə olaraq qeyd olunur ki, “Maduro dünyadakı ən təhlükəli narkotik qaçaqçıları və narko-terrorçularla əməkdaşlıq edib.”
