Bloomberg agentliyinə görə, Venesuelada neft hasilatı və ixracı infrastrukturunun hərtərəfli yenidən qurulması və 1970-ci illərlə müqayisə oluna bilən göstəricilərə nail olunması qarşıdakı 10 il ərzində 100 milyard ABŞ dollarından artıq vəsait tələb edə bilər. Bu qiymətləndirməni Bloomberg-ə Beyker Dövlət Siyasəti İnstitutunun Latın Amerikası üzrə enerji siyasəti istiqamətinin direktoru Fransisko Monaldi verib.
Onun sözlərinə görə, Vaşinqtonun planlarının maksimum dərəcədə həyata keçirilməsi halında Venesuelanın neft ehtiyatlarının işlənməsi üçün ən real namizədlər sırasında ABŞ şirkətləri ExxonMobil, ConocoPhillips və Chevron yer alır. Sonuncu şirkət Vaşinqton və Karakas arasında gərgin münasibətlərin davam etməsinə baxmayaraq, Venesuelada fəaliyyətini davam etdirib. Monaldinin fikrincə, bu üç şirkət qarşıdakı on il ərzində hər il təxminən 10 milyard ABŞ dolları həcmində vəsait ayırmalı olacaq.
Agentliyin sorğuladığı ekspertlər bildiriblər ki, Venesuelanın neft hasilatı infrastrukturu və logistika imkanları 1970-ci illərdə gündəlik 4 milyon barel səviyyəsində olan pik hasilat dövründən bəri böyük ölçüdə mənəvi cəhətdən köhnəlib. Son illərdə respublikada hasilat təxminən 1 milyon barel səviyyəsində olub. Hasilatın azalması həm qlobal neft qiymətləri üzrə konyunktura, həm də infrastruktur sistemlərinin xroniki şəkildə maliyyələşdirilməməsi, qabaqcıl texnologiyalara çıxışın olmaması və Venesuelaya qarşı tətbiq edilən sanksiya təzyiqi ilə əlaqədar olub. Ekspertlərin fikrincə, bu qədər iri investisiyaların yatırılması üçün ölkədə sabit siyasi vəziyyətin də formalaşması zəruridir.
Daha əvvəl ABŞ dövlət katibi Marko Rubio ABC telekanalına bildirib ki, Amerika neft şirkətləri Venesueladakı neft yataqlarının istismarı hüquqlarını əldə etməyə çalışacaqlar.
