Son zamanlar uşaqlar arasında kəskin virus infeksiyası yayılıb. Bu zaman isə bəzi valideynlər övladlarını tez sağaltmaq məqsədilə və təhlükəsiz zənn edərək dərhal venadaxili inyeksiyaya üz tuturlar.
Bəs zənn edildiyi qədər venadaxili inyeksiyalar təhlükəsizdirmi?
Mövzu ilə bağlı Pravda.az-a açıqlama verən pediatr Xəyalə Quliyevanın sözlərinə görə, ötən ilin oktyabr-noyabr aylarından başlayaraq uşaqlar arasında influenza virusu tüğyan edir:
“Xəstəliyin yayılmasında valideynlər də rol oynayır. Onlar bəzən xəstəliyə səthi yanaşırlar. Uşaqda hərarət olduğu halda onu bağçaya, məktəbə göndərirlər, öskürək olur, özbaşlarına müalicə edirlər. Bu da xəstəliyin daha da ağırlaşmasına səbəb olur. Çünki influenza uşaqlarda ağır gedişata malik virus infeksiyasdır. Xüsusilə də pnevmoniya kimi ağrılaşmalara gətirib çıxara bilər. Vaxtında, yəni xəstəliyin ilk 24–48 saatı ərzində müdaxilə olunarsa, simptomlarda xeyli yüngülləşmə müşahidə edilə bilər və ağırlaşmaların qarşısı alınar. Lakin xəstəlik kəskinləşdikdə və əlamətlər daha da irəlilədikdə, ağırlaşmalar baş verə bilər. Bir sıra valideynlər həkim göstərişi olmadan venadaxili inyeksiyaya üz tuturlar. Bu xəstəlikdə istifadə edilən venadaxili inyeksiya, uşağın hərarətini aşağı salmaq məqsədilə parasetamol tərkibli dərmanların sistem formasında vücuda yeridilməsidir. Çünki influenzada çox dirəncli hərarət olur. Dərman müdaxiləsinə baxmayaraq qızdırma enmir. Hətta hərarət 41-42-ə qədər yüksələ bilər. Eyni zamanda quru öskürək müşahidə edilir. Hətta ishal, qusma da prosesə qoşulur. Uşaq heç nə yeməyib, ağızdan qidalanmayanda, qusma, ishal da müşahidə edilərsə, venadaxili inyeksiya tövsiyə edilir. Bunlar həkim göstərişi ilə olmalıdır”.
X.Quliyeva onu da əlavə edib ki, bəzən venadaxili sistem anafilaktik şok yarada bilər: “Bu, uşağın dərman preparatına qarşı həssaslığı, allergik reaksiyası olduğunda, düzgün icra edilməyəndə istənilməyən nəticələr doğura bilər. İnfluenza zamanı ilk olaraq oseltamivir tərkibli dərmanlardan istifadə edilir. Sirop və kapsul formasında verilə bilər. Uşağın yaşı, çəkisinə görə həkim tərəfindən təyin edilir. İlk 24 və ya 48 saat ərzində verilərsə öz müsbət təsirini göstərə bilər”.
Şəhanə Quliyeva
