Samsung CES 2026 sərgisində ilk dəfə qatlanan, amma ortasında qat izi görünməyən OLED ekranını nümayiş etdirib. Yenilik Las-Veqasda şirkətin stendində göstərilib.
Şirkət bildirir ki, bu yeni ekran gələn ilin ikinci yarısında çıxması gözlənilən Galaxy Z Fold 8 modelində istifadə oluna bilər. Hətta eyni texnologiyanın gələcək qatlanan iPhone-da da tətbiq ediləcəyi istisna edilmir.
Müqayisə zamanı məlum olub ki, Galaxy Z Fold 7-də qat izi azalsa da, müəyyən bucaqlardan yenə görünürdü. Yeni ekranda isə bu iz tamamilə yoxa çıxıb. Samsung deyir ki, mətn və görüntü qat yerində belə fasiləsiz görünür, sanki ekran bütövdür.
Bu nəticə ekrana yerləşdirilən, lazerlə deşiklənmiş xüsusi metal lövhə sayəsində əldə olunub. Həmin lövhə ekran qatlananda yükü bərabər paylayır. Detalı Cənubi Koreyanın Fine M-Tec şirkətinin istehsal etdiyi bildirilir.
Əgər bu texnologiya Galaxy Z Fold 8-də istifadə olunarsa, qatlanan telefonların ən çox tənqid edilən problemi – ortadakı qat izi – aradan qalxmış olacaq. Üstəlik, ekranın daha davamlı olacağı da gözlənilir.
