Liam Rosenyör "Çelsi"nin baş məşqçisi təyin edildi. Oxməni.az-ın verdiyi məlumata görə, bu barədə İngiltərə klubunun saytında məlumat verilib.
O, 2032-ci ilə qədər müqavilə imzalayıb.
Bu vəzifədə 41 yaşlı ingilis, 1 yanvar tarixində vəzifəsindən azad edilən italyan Enzo Mareskanı əvəz edib.
Mareska London klubuna 2024-cü ilin iyun ayından rəhbərlik edirdi. "Çelsi" ilə o, Konfrans Liqasını (2024/25) və Klublararası dünya çempionatını (2025) qazanıb. İngiltərə Premyer Liqasının (APL) cari mövsümündə komanda 20 turdan sonra 31 xalla beşinci yerdədir.
Rosenyör futbolçu kimi APL-də "Fülhem", "Redinq" və "Hull Siti" klublarında çıxış edib, İngiltərənin gənclər yığmasına dəvət alıb.
Karyerasını bitirdikdən sonra o, "Brayton"ın gənclər komandasında çalışıb, "Derbi Kaunti" və "Hull Siti"ni məşq edib, 2024-cü ilin iyul ayından isə Rosenyör Fransa "Strasburq"una rəhbərlik edib. Fransa çempionatının cari mövsümündə "Strasburq" 17 turdan sonra yeddinci yerdədir.
Almaz Həsənli
