Azərbaycan qlobal səviyyədə ən təhlükəsiz məkanlardan biri hesab edilə bilər.
Bu fikri Azərbaycan Prezidenti İlham Əliyev yerli televiziya kanallarına müsahibəsində deyib.
Azərbaycanı turistlər üçün cəlb edən meyarlardan söz açan dövlət başçısı, həmçinin qeyd edib ki, iki aydan sonra Şahdağda ilk dəfə Xizəksürmə üzrə dünya çempionatı olacaq: “Dünya çempionatı Şahdağda ilk dəfə keçiriləcək. Ölkəmiz Beynəlxalq Xizək Federasiyasının təqviminə artıq daxil edilib. Azərbaycan cənub ölkəsidir. Çimərliklər buradan uzaqda deyil. Öz həcminə, miqyasına və gözəlliyinə görə nadir olan “Sea Breeze” böyük tikinti layihəsi həyata keçirilir. Dünyanın heç bir yerində buna oxşar layihə yoxdur. Bir məkanda həm mehmanxana, həm əyləncə, həm yaşayış yerləri və digər imkanlar mövcuddur”. Qeyd edək ki, Azərbaycan qlobal səviyyədə ən təhlükəsiz məkanlardan biri kimi beynəlxalq ictimaiyyətin diqqətini getdikcə daha çox cəlb edir. Müasir dövrdə təhlükəsizlik anlayışı təkcə hərbi sabitliklə məhdudlaşmır, eyni zamanda daxili asayişin qorunması, ictimai sabitlik, sosial harmoniyanın mövcudluğu və dövlət institutlarının effektiv fəaliyyəti ilə ölçülür. Məhz bu meyarlar baxımından Azərbaycan regional və qlobal miqyasda seçilən ölkələr sırasında yer alır.
Ölkədə ictimai-siyasi sabitliyin qorunması təhlükəsizliyin əsas təməlini təşkil edir. Azərbaycan dövləti uzun illərdir ardıcıl və balanslaşdırılmış siyasət həyata keçirərək daxili sabitliyi təmin edib. Güclü dövlət idarəçiliyi, hüquq-mühafizə orqanlarının peşəkar fəaliyyəti və cəmiyyətlə dövlət arasında mövcud olan qarşılıqlı etimad mühiti təhlükəsizlik risklərinin minimuma endirilməsində mühüm rol oynayır. Cinayətkarlıq səviyyəsinin aşağı olması və ictimai asayişin etibarlı şəkildə qorunması ölkənin təhlükəsiz imicini daha da möhkəmləndirir. Azərbaycanın təhlükəsizliyinin digər vacib aspekti milli həmrəylik və multikultural dəyərlərin qorunmasıdır. Müxtəlif etnik və dini qrupların sülh və qarşılıqlı hörmət şəraitində yaşaması ölkədə sosial gərginliyin yaranmasına imkan vermir. Multikulturalizm dövlət siyasətinin əsas istiqamətlərindən biri kimi həyata keçirilir və bu, radikalizm və ekstremizm risklərinin qarşısının alınmasında mühüm amildir. Dini dözümlülük və mədəni müxtəlifliyin qorunması Azərbaycanın qlobal təhlükəsizlik baxımından etibarlı məkan kimi tanınmasına töhfə verir. Regionda mürəkkəb geosiyasi şəraitə baxmayaraq, Azərbaycan təhlükəsizlik sahəsində müstəqil və praqmatik siyasət yürüdür. Ölkə qonşuları və beynəlxalq tərəfdaşları ilə əməkdaşlığa üstünlük verərək regional sabitliyin möhkəmlənməsinə töhfə verir. Terrorizm, transmilli cinayətkarlıq, qeyri-qanuni miqrasiya kimi qlobal təhlükələrə qarşı beynəlxalq əməkdaşlıq çərçivəsində fəal iştirak Azərbaycanın təhlükəsizlik sahəsində etibarlı tərəfdaş olduğunu nümayiş etdirir.
Nahid SALAYEV
