Vaşinqton Kopenhageni kənarda qoyaraq birbaşa ada sakinləri ilə təmas qurmağa çalışır...
Poliqon xəbər verir ki, Financial Times nəşrinin mənbələrə istinadla yazdığına görə, ABŞ prezidenti Donald Tramp Qrenlandiya məsələsində əvvəlki xəttindən geri çəkilərək Danimarka hakimiyyətini hədələməkdən ada əhalisi ilə birbaşa əlaqələr qurmağa keçib. Danimarkalı rəsmilərin fikrincə, bu dəyişiklik yeni və daha çətin mərhələnin başlaya biləcəyinə işarədir.
Nəşrin həmsöhbətlərindən biri bildirib ki, Kopenhagen üçün əsas narahatlıq bundan sonrakı addımların nə olacağıdır. “Bizi qorxudan da məhz budur: növbəti mərhələdə nə baş verəcək”, deyə mənbə qeyd edib.
Danimarka rəsmiləri vurğulayırlar ki, Qrenlandiya ABŞ investisiyalarına açıqdır. Bununla belə, amerikalı biznes dairələri hələlik adada formalaşmaqda olan dağ-mədən sənayesinin inkişafına ciddi maraq göstərmirlər. Bu da Vaşinqtonun siyasi fəallığı ilə iqtisadi maraqlar arasında ziddiyyət yaradır.
Avropa İttifaqının yüksəkvəzifəli diplomatlarından biri Financial Timesə bildirib ki, ABŞ indiyədək yalnız bir şeyi təklif etməyib və heç vaxt da təklif edə bilməz: Qrenlandiyanın Amerikanın tərkibinə daxil olması. Digər mənbənin fikrincə isə, Vaşinqton üçün adanı rəsmi şəkildə anneksiya etməyə ehtiyac yoxdur, çünki “istədiklərinin hamısını onsuz da əldə edə bilərlər”. Məhz bu amil vəziyyəti daha da qeyri-müəyyən və anlaşılmaz edir.
Müşahidəçilər hesab edirlər ki, Tramp administrasiyasının birbaşa Qrenlandiya cəmiyyətinə yönələn yanaşması ada daxilində siyasi və ictimai müzakirələri gücləndirə, eyni zamanda Danimarka–ABŞ münasibətlərində yeni gərginlik mənbəyinə çevrilə bilər.
Poliqon.info
