İranın müxalifətə yaxın media qurumları daha əvvəl etirazçıların İraq sərhədi yaxınlığında yerləşən, İlam əyalətinə aid Abdanan şəhərinə nəzarəti ələ keçirdiyini bildirmişdi.
Vətəninfo.az xəbər verir ki, Fox News-un yaydığı məlumata görə, Abdananla yanaşı, Məlikşahi şəhəri də etirazçıların nəzarətinə keçib. İran Milli Müqavimət Şurası Abdananın faktiki olaraq tam şəkildə ələ keçirildiyini açıqlayıb.
ABŞ Nümayəndələr Palatasının Xarici Əlaqələr Komitəsinin üzvü Əli Səfəvi Fox News-a verdiyi açıqlamada bildirib ki, İranın qərbində etirazçıların nəzarətinə keçən bu iki şəhərdə əlamətdar hadisələr baş verir və insanlar küçələrdə bunu bayram edirlər.
İran İnsan Hüquqları üzrə Milli Şurasının prezidenti Məryəm Rəcəvi də X (keçmiş Twitter) platformasında paylaşım edərək Məlikşahi və Abdanandakı etirazçılara təşəkkür edib. Onun sözlərinə görə, etirazçılar rejimin təhlükəsizlik qüvvələrini geri çəkilməyə məcbur ediblər.
Bu arada, İranın sonuncu şahının oğlu, vəliəhd şahzadə Rza Pəhləvi Fox News-a verdiyi müsahibədə keçid prosesində aparıcı rol oynamağa hazır olduğunu bildirib. O, məqsədinin milli referendum və konstitusiya məclisi vasitəsilə dinc dəyişikliklərə nail olmaq olduğunu vurğulayıb və İranda gedən mübarizəyə qoşulmağa hər zamankindən daha hazır olduğunu deyib.
“Mənim rolum həmvətənlərimə bu hədəfə çatmaqda yardım etməkdir. Son nəticənin necə olmasına qərəzsiz yanaşıram, əsas odur ki, nəticədə dünyəvi və demokratik bir idarəetmə forması qurulsun”, – deyə Pəhləvi Fox News-un aparıcısı Şon Hannitiyə bildirib.
Vəliəhd şahzadə əlavə edib ki, şərait tələb etdiyi anda İranla bağlı proseslərə daha fəal şəkildə qoşulmağa və həlledici mərhələdə xalqı ilə birlikdə mübarizəyə rəhbərlik etməyə hazırdır.
