Burkina Fasonun təhlükəsizlik xidmətləri prezident İbrahim Traore də daxil olmaqla, yüksək vəzifəli məmurlara qarşı planlaşdırılan sui-qəsdin qarşısını alıb.
Doğru.az xəbər verir ki, bu barədə ölkənin təhlükəsizlik naziri Mahamadou Sana RTB yayımına açıqlamasında bildirib. Onun sözlərinə görə, qeyri-sabitləşdirmə əməliyyatı 3 yanvar 2026-cı il tarixinə planlaşdırılıb və bir sıra hədəfli sui-qəsdləri əhatə edib.
Nazir qeyd edib ki, planın ilk mərhələsində dövlət başçısının aradan qaldırılması nəzərdə tutulurdu. Sana efirdə çıxışı zamanı vurğulayıb ki, “Burkina Faso bir daha sabitliyi pozmaq cəhdlərinin qarşısını alıb”.
Onun sözlərinə görə, müxtəlif sui-qəsd üsulları müzakirə edilib, daha sonra hücum edənlər PUA bazasını sıradan çıxarmaq və xarici qüvvələrin iştirakı ilə yerüstü əməliyyat keçirməyi planlaşdırıblar.
Təhlükəsizlik naziri istintaqın davam etdiyini, artıq bir neçə nəfərin saxlanıldığını və ölkədə vəziyyətin tam nəzarət altında olduğunu bildirib. O, əhalini sakitliyə və təxribatlara uymamağa çağırıb.
Qeyd edək ki, daha əvvəl Nigeriyada bir kəndə hücum edən yaraqlıların 40-dan çox insanın ölümünə və bir neçə sakinin qaçırılmasına səbəb olduğu barədə məlumat yayılmışdı. Bundan əlavə, regionda seçkiləri pozmağa hazırlaşan iki yaraqlı bazasının MAR ərazisində məhv edildiyi bildirilir.
DOĞRU.AZ
